ଭୁବନେଶ୍ୱର ( ସତ୍ୟପାଠ ବ୍ୟୁରୋ ): ମଙ୍ଗଳବାର ଠାରୁ ଆରମ୍ଭ ହୋଇଛି ମଧ୍ୟପ୍ରଦେଶ ବିଧାନସଭାର ମୌସୁମୀ ଅଧିବେଶନ। ଏହି ପାଞ୍ଚ ଦିନିଆ ଅଧିବେଶନର ପ୍ରଥମ ଦିନରେ କଂଗ୍ରେସ ବିଧାୟକମାନେ ଫସଲର ଉଚିତ୍ ମୂଲ୍ୟ ଦାବି କରି ଅଭିନବ ଢ଼ଙ୍ଗରେ ପ୍ରତିବାଦ କରିଥିଲେ। ଅଧିବେଶନର ପ୍ରଥମ ଦିନରେ ବିଧାନସଭାରେ ରସୁଣ ବସ୍ତା ନେଇ ପହଞ୍ଚିଥିଲେ କଂଗ୍ରେସ ବିଧାୟକ। ଏହାକୁ ନେଇ ପୂର୍ବତନ ମନ୍ତ୍ରୀ ତଥା କଂଗ୍ରେସ ବିଧାୟକ ଜିତୁ ପଟୱାରୀ କହିଛନ୍ତି ଯେ, ଆଦରଣୀୟ କୃଷି ମନ୍ତ୍ରୀ, ମୁଖ୍ୟମନ୍ତ୍ରୀ, ଆପଣ ୨୦୨୦ ରେ କୃଷକଙ୍କ ଆୟ ଦ୍ୱିଗୁଣିତ କରିବାକୁ ପ୍ରତିଶୃତି ଦେଇଥିଲେ। ନିକଟରେ କୃଷି ମନ୍ତ୍ରୀ ମଧ୍ୟ ଦାବି କରିଥିଲେ ଯେ ମଧ୍ୟପ୍ରଦେଶ ହେଉଛି ଦେଶର ପ୍ରଥମ ରାଜ୍ୟ ଯେଉଁଠାରେ କୃଷକଙ୍କ ଆୟ ଦ୍ୱିଗୁଣିତ ହୋଇଛି, ମୋର ସହକର୍ମୀମାନେ ଏବଂ ମୁଁ ବିଧାନସଭାକୁ ରସୁଣ ନେଇ ଆସିଛୁ। ଦୟାକରି ଆମକୁ କେବଳ ଆମର ଚାଷ ମୂଲ୍ୟ ଦିଅନ୍ତୁ ବୋଲି ସେ କହିଥିଲେ।
ବିଧାନସଭାକୁ ରସୁଣ ବସ୍ତା ନେଇ ଆସିଥିବା କଂଗ୍ରେସ ବିଧାୟକଙ୍କୁ ପୋଲିସ ଓ ମାର୍ଶଲମାନେ ଅଟକାଇଥିଲେ। ଏହା ପରେ ବିଧାୟକମାନେ ନିଜେ ବିଧାନସଭା ଦ୍ୱାରରେ ରସୁଣର ବସ୍ତା ଖୋଲି ଅଖା ଫିଙ୍ଗିଥିଲେ। ପରେ ମ୍ୟୁନିସିପାଲିଟି କର୍ପୋରେଶନ ବିଧାନସଭା ଦ୍ୱାରରୁ ରସୁଣ ସଫା କରିଥିଲେ। ତେବେ ରାଜ୍ୟରେ ରସୁଣର ଭଲ ଉତ୍ପାଦନ ପରେ ମଧ୍ୟ କୃଷକମାନେ ଫସଲର ଉଚିତ୍ ମୂଲ୍ୟ ପାଇପାରୁ ନଥିବା ଅଭିଯୋଗ ହେଉଛି। ମଣ୍ଡିରେ କିଲୋଗ୍ରାମ ପିଛା ଏକ ଟଙ୍କରେ ରସୁଣ ବିକ୍ରିକୁ ନେଇ ଚର୍ଚ୍ଚା ହେଉଛି। ଏପରିକି ସେମାନଙ୍କ ଖର୍ଚ୍ଚ ମଧ୍ୟ ପୂରଣ ହେଉନାହିଁ ବୋଲି କୃଷକମାନେ କହିଛନ୍ତି। କୃଷକମାନେ କହିଛନ୍ତି ଯେ ମାଲୱା ଅଞ୍ଚଳରେ ରସୁଣ ଫସଲ ଚାଷ କରାଯାଏ। ଏହା ସତ୍ତ୍ୱେ ସରକାର କୌଣସି ପ୍ରକ୍ରିୟା କରଣ ୟୁନିଟ ନିର୍ମାଣ କରିନାହାଁନ୍ତି। ଅନେକ ସ୍ଥାନରେ ଚାଷୀମାନେ ବିରୋଧ କରୁଛନ୍ତି। କୃଷକମାନେ କହିଛନ୍ତି ଯେ ସରକାର କ୍ୱିଣ୍ଟାଲ ପିଛା ସର୍ବନିମ୍ନ ସହାୟକ ମୂଲ୍ୟ ୫୦୦୦ ଟଙ୍କା ମୂଲ୍ୟରେ ରସୁଣ କିଣିବା ଉଚିତ।
