(ସତ୍ୟପାଠ ବ୍ୟୁରୋ) ଭୁବନେଶ୍ୱର : ମେ ୨ ରେ ହୋଇଥିବା ଭୋଟ ଗଣତି ପରେ ଅନେକ ରେକର୍ଡ ସାମ୍ନାକୁ ଆସିଛି । ଏମିତି ଏକ ଇତିହାସ କରିଛନ୍ତି ଚନ୍ଦନା ବଉରୀ । ପଶ୍ଚିମବଙ୍ଗର ସଲ୍ଟୋରା ନିର୍ବାଚନମଣ୍ଡଳୀରୁ ସେ ବିଜେପି ପ୍ରାଥୀ ହୋଇଥିଲେ । ୩୦ ବର୍ଷୀୟା ଚନ୍ଦନା ତାଙ୍କ ନିକଟତମ ପ୍ରତିଦୋନ୍ଦି ଟିଏମସି ପ୍ରାର୍ଥୀ ସନ୍ତୋଷ କୁମାର ମୋଣ୍ଡାଲଙ୍କୁ ୪,୦୦୦ ରୁ ଅଧିକ ଭୋଟ ବ୍ୟବଧାନରେ ପରାସ୍ତ କରିଛନ୍ତି। ଆଶ୍ଚର୍ଯ୍ୟର କଥା ଚନ୍ଦନା ବଉରୀଙ୍କ ପତି ଜଣେ ଦିନ ମଜୁରିଆ । ଚନ୍ଦନାଙ୍କ ବିଜୟ ପରେ ଅନେକ ପ୍ରଶଂସକ ଟ୍ୱିଟରକୁ ଯାଇ ଆଶ୍ଚର୍ଯ୍ୟଜନକ ସଫଳତା ପାଇଁ ତାଙ୍କୁ ଅଭିନଦନ ଜଣାଇଥିଲେ । ତାଙ୍କ ଦ୍ଵାରା ଦାଖଲ ହୋଇଥିବା ନିର୍ବାଚନ ଆଫିଡେଭିଟ୍ ଅନୁଯାୟୀ ଚନ୍ଦନାଙ୍କ ସମ୍ପତ୍ତି ମାତ୍ର ୩୧,୯୮୫ ଟଙ୍କା ହୋଇଥିବାବେଳେ ତାଙ୍କ ସ୍ୱାମୀଙ୍କ ସମ୍ପତ୍ତି ୩୦,୩୧୧ ଟଙ୍କା ରହିଛି। ଚନ୍ଦନାଙ୍କ ସ୍ୱାମୀ ଦୈନିକ ମଜୁରୀଆ ଭାବରେ କାମ କରନ୍ତି | ତିନି ସନ୍ତାନଙ୍କ ମାତା ଚନ୍ଦନା, ତାଙ୍କର ତିନୋଟି ଗାଈ ଏବଂ ତିନୋଟି ଛେଳି ଅଛନ୍ତି । ମାର୍ଚ୍ଚ ମାସରେ ANI ସହିତ କଥାବାର୍ତ୍ତା ବେଳେ ସେ କହିଥିଲେ, “ଟିକେଟ୍ ଘୋଷଣା ହେବା ପୂର୍ବରୁ ମୋର କୌଣସି ଧାରଣା ନଥିଲା ଯେ ମୁଁ ବିଧାନସଭା ନିର୍ବାଚନରେ ପ୍ରାର୍ଥୀ ଭାବରେ ମନୋନୀତ ହେବି। ଅନେକ ଲୋକ ମୋତେ ଅନଲାଇନରେ ନାମାଙ୍କନପତ୍ର ଦାଖଲ କରିବାକୁ ଉତ୍ସାହିତ କରିଥିଲେ, କିନ୍ତୁ ମୁଁ ଭାବି ନଥିଲି ଯେ ମୁଁ ଏହି ସଫଳତା ହାସଲ କରିବାକୁ ସମର୍ଥ ହେବି ” ଵୋଲି କହିଛନ୍ତି ।ଅନେକ ଚନ୍ଦନାଙ୍କ ବିଜୟକୁ ଚମତ୍କାର ଏବଂ ପ୍ରେରଣାଦାୟକ ବୋଲି କହିଛନ୍ତି ।
