ଉତ୍ତେଜନା ସୃଷ୍ଟିକାରୀ ନେତାଙ୍କ ବିରୋଧରେ FIR କର: ଦିଳ୍ଲୀ ହାଇକୋର୍ଟ

(ସତ୍ୟପାଠ ବ୍ୟୁରୋ) ନୂଆଦିଲ୍ଲୀ: ଦିଲ୍ଲୀ ହିଂସା ନିୟନ୍ତ୍ରଣ ଲାଗି ସେନା ମୁତୟନ କରାଯିବନି । ଉତ୍ତେଜନା ସୃଷ୍ଟିକାରୀ ନେତାଙ୍କ ବିରୋଧରେ ତୁରନ୍ତ ଏଫ୍‌ଆଇଆର ରୁଜ୍ଜୁ କର । ଦିଲ୍ଲୀ ହିଂସାକୁ ନେଇ ଏମିତି ଅନେକ ଗୁରୁତ୍ବପୂର୍ଣ୍ଣ ଟିପ୍ପଣି ଦେଇଛନ୍ତି ଦିଲ୍ଲୀ ହାଇକୋର୍ଟ । କୋର୍ଟ ଏ ସଂପର୍କରେ ନିଜର କଡ଼ା ଆଭିମୁଖ୍ୟ ପୋଷଣ କରି କହିଛନ୍ତି ହିଂସା ପୀଡ଼ିତ ଓ ତାଙ୍କ ପରିବାରକୁ ଉଭୟ କେନ୍ଦ୍ର ଏବଂ ଦିଲ୍ଲୀ ସରକାରଙ୍କ ଅଧିକାରୀମାନେ ସାକ୍ଷାତ କରନ୍ତୁ ।

ଦିଲ୍ଲୀ ହିଂସାକୁ ନେଇ ଖପ୍ପା ଦିଲ୍ଲୀ ହାଇକୋର୍ଟ । ଦିଲ୍ଲୀ ହିଂସାକୁ ନେଇ ସମାଜସେବୀ ତଥା ପୂର୍ବତନ ପ୍ରାଶାସନିକ ଅଧିକାରୀ ହର୍ଷ ମନ୍ଦେରଙ୍କ ଦ୍ବାରା ଆଗତ ଏକ ମାମଲାର ଶୁଣାଣି କରି କୋର୍ଟ କହିଛନ୍ତି, ଦିଲ୍ଲୀରେ ଉତ୍ତେଜନା ସୃଷ୍ଟିକାରୀ ଭାଷଣ ଦେଇଥିବା ନେତାଙ୍କ ବିରୋଧରେ କାହିଁକି ଏଯାଏ FIR ହୋଇନାହିଁ, ଏଫ୍‌ଆଇଆର ନ ହେଲେ ପୋଲିସ କାର୍ଯ୍ୟାନୁଷ୍ଠାନ ନେବ କିପରି ? ତେଣୁ ତୁରନ୍ତ ସେମାନଙ୍କ ବିରୋଧରେ ଏଫ୍‌ଆଇଆର ରୁଜ୍ଜୁ କର।

କେନ୍ଦ୍ର ସରକାର ଓ ଦିଲ୍ଲୀ ସରକାରଙ୍କ ଉଚ୍ଚ ପଦାଧିକାରୀମାନେ ହିଂସା ପୀଡ଼ିତ ଓ ତାଙ୍କ ପରିବାରକୁ ଭେଟିବାକୁ ନିର୍ଦ୍ଦେଶ ଦେଇଛନ୍ତି କୋର୍ଟ । କୋର୍ଟ କହିଛନ୍ତି, ଏବେ ସମୟ ଆସିଯାଇଛି, ଯେତେବେଳେ ସାଧାରଣ ଲୋକଙ୍କୁ ଜେଡ୍‌ କାଟାଗୋରୀ ସୁରକ୍ଷା ମଧ୍ୟରେ ରଖାଯିବ । ଖାଲି ସେତିକି ନୁହେଁ, କୋର୍ଟ କହିଥିଲେ, ଦିଲ୍ଲୀରେ ପୁଣି ଥରେ ୧୯୮୪ ଦଙ୍ଗା ଭଳି ପରିସ୍ଥିତି ସୃଷ୍ଟି ହେବାକୁ ଦିଆଯିବନି । ପୋଲିସ ଉଗ୍ର ଭାଷଣ ଉପରେ କାର୍ଯ୍ୟାନୁଷ୍ଠାନ ନ ନେବା ଦ୍ବାରା ଲୋକଙ୍କ ପାଖକୁ ଭୁଲ୍‌ ବାର୍ତ୍ତା ଗଲା । ପୋଲିସ ଏହି ଉତ୍ତେଜନାମୂଳକ ଭାଷଣକୁ ନେଇ କାର୍ଯ୍ୟାନୁଷ୍ଠାନ ନେବା ଉଚିତ୍‌ । ଗୁରୁବାର ଅପରାହ୍ନ ୩ଟା ସୁଦ୍ଧା ନିଜ ମତ ରଖିବା ଲାଗି ଦିଲ୍ଲୀ ପୋଲିସ କମିଶନରଙ୍କୁ କହିଛନ୍ତି କୋର୍ଟ । ଏହି ମାମଲାର ପରବର୍ତ୍ତୀ ଶୁଣାଣି ଗୁରୁବାର ମଧ୍ୟ ହେବ ।

ଆବେଦନକାରୀଙ୍କ ଦାବି ଥିଲା ଯେ ଉତ୍ତେଜନାମୂଳକ ଭାଷଣ ଯୋଗୁଁ ଦିଲ୍ଲୀରେ ହିଂସା ବଢ଼ିଛି। ତେଣୁ କୋର୍ଟ ସେସବୁ ଭାଷଣର ଭିଡିଓ କ୍ଲିପ ମଗାଇଥିଲେ । କୋର୍ଟରେ ସମସ୍ତ କ୍ଲିପ୍‌କୁ ଗୋଟି ଗୋଟି କରି ଶୁଣିଥିଲେ । କୋର୍ଟ ୪ ଜଣ ବିଜେପି ନେତାଙ୍କର ଭିଡିଓ କ୍ଲିପ ଶୁଣିବା ପରେ କ୍ଷୋଭ ପ୍ରକାଶ କରିଥିଲେ ଆଉ ସେମାନଙ୍କ ବିରୋଧରେ ତୁରନ୍ତ FIR କରିବାକୁ ନିର୍ଦ୍ଦେଶ ଦେଇଥିଲେ ।