ଭୁବନେଶ୍ୱର,୧୭/୩(ସତ୍ୟପାଠ ବ୍ୟୁରୋ): ବିଧାନସଭାରେ ଉଠିଲା ଆଇଏଏସ ବଦଳି ପ୍ରସଙ୍ଗ। ଜଣେ ଅଫିସର୍ ଗୋଟିଏ ବିଭାଗରେ ବର୍ଷ ବର୍ଷ ଧରି ରହିବା ନେଇ ପ୍ରଶ୍ନ ଉଠାଇଲେ ବିରୋଧୀ। ମୟୂରଭଞ୍ଜ, କେନ୍ଦୁଝର ଜିଲ୍ଲାପାଳ, ଏଡିଜି ଅରୁଣ ବୋଥ୍ରା ଏବଂ ନଗର ଉନ୍ନୟନ ସଚିବ ଜି. ମାଥିଭଥନନ, ଯୋଗାଣ ବିଭାଗ ସଚିବ ବୀର ବିକ୍ରମ ଜଦବ ଏବଂ ପଞ୍ଚାୟତିରାଜ ବିଭାଗର ସଚିବ ସୁଶୀଲ ଲୋହନୀଙ୍କୁ ଦୀର୍ଘ ଦିନ ହେବ ଗୋଟିଏ ପଦବୀରେ ରହିବା ନେଇ ସରକାରଙ୍କୁ ଶାଣିତ ଆକ୍ରମଣ କରିଛନ୍ତି ବିରୋଧୀ। ଦୀର୍ଘ ଦିନ ଧରି ରାଜ୍ୟ ସରକାର ଏହି ଆଇଏଏସ ଅଧିକାରୀଙ୍କୁ ଗୋଟିଏ ପଦବୀରେ ନିଯୁକ୍ତି ଦେବାକୁ ନେଇ ବିରୋଧୀ ରାଜ୍ୟ ସରକାରଙ୍କ ଆଭିମୁଖ୍ୟ ଉପରେ ପ୍ରଶ୍ନ ଉଠାଇଛନ୍ତି।
ଗୁରୁବାର ଶୂନ୍ୟକାଳରେ ବିରୋଧୀ ଦଳ ନେତା ଜୟନାରାୟଣ ମିଶ୍ର ଏହି ପ୍ରସଙ୍ଗରେ ସରକାରଙ୍କୁ ଶାଣିତ ଆକ୍ରମଣ କରି କହିଥିଲେ ଯେ, ପ୍ରତ୍ୟେକ ଜିନିଷ ପାଇଁ ସରକାରଙ୍କ ଏକ ନିର୍ଦ୍ଦିଷ୍ଟ ନୀତି ରହିବା ଆବଶ୍ୟକ। ଗୁରୁତ୍ବପୂର୍ଣ୍ଣ ପଦବିରେ ଦୀର୍ଘ ଦିନ ଧରି ଜଣେ ଅଫିସର ରହିଲେ ଅନେକ ସମସ୍ୟା ସୃଷ୍ଟି ହୁଏ। କ୍ଷମତାର ଅପବ୍ୟବହାର କରିବାର ସୁଯୋଗ ସୃଷ୍ଟି ହୁଏ। ତେଣୁ ନିୟମିତ ବ୍ୟବଧାନରେ ଏମାନଙ୍କୁ ବଦଳି କରିବାର ଆବଶ୍ୟକତା ରହିଛି। କେନ୍ଦୁଝର ଓ ମୟୂରଭଞ୍ଜ ଜିଲ୍ଲାପାଳ ୬ ବର୍ଷ ହେଲା ଗୋଟିଏ ଜାଗାରେ ଅଛନ୍ତି। କେନ୍ଦୁଝର ଜିଲ୍ଲାପାଳ ପ୍ରଶାସନିକ କାର୍ଯ୍ୟ ବାଦ୍ ଅନ୍ୟ ସବୁ କାମରେ ବିଶେଷ କରି ବେପାରରେ ବ୍ୟସ୍ତ ରହୁଛନ୍ତି। ଏହି ଗୃହରେ ପୂର୍ବରୁ ପଚରାଯାଇଥିବା ଏକ ପ୍ରଶ୍ନର ଉତ୍ତରରେ ସରକାର ଦର୍ଶାଇଛନ୍ତି ଯେ ନଗର ଉନ୍ନୟନ ବିଭାଗର ପ୍ରମୁଖ ଶାସନ ସଚିବ ୯ ବର୍ଷ ହେଲା ସେହି ଗୋଟିଏ ଜାଗାରେ ଅଛନ୍ତି। ଯୋଗାଣ ବିଭାଗର ପ୍ରମୁଖ ସଚିବ ବୀର ବିକ୍ରମ ଯାଦବ ୨୦୧୭ରୁ ସେଠାରେ ଅଛନ୍ତି। ତାଙ୍କୁ ପୁଣି ଜଗନ୍ନାଥ ମନ୍ଦିର ପ୍ରଶାସନର ମୁଖ୍ୟ ପ୍ରଶାସକ, ପୂର୍ତ୍ତ ସଚିବ, ପଣ୍ୟାଗାର ନିଗମ ଅଧ୍ୟକ୍ଷ ଆଦି ବହୁ ଗୁରୁତ୍ବପୂର୍ଣ୍ଣ ପଦବିର ଅତିରିକ୍ତ ଦାୟିତ୍ବ ତାଙ୍କୁ ଦିଆଯାଇଛି। ସେହିପରି ପଞ୍ଚାୟତିରାଜ ବିଭାଗର ସଚିବ ସୁଶୀଲ ଲୋହାନି ଓ ଆଇପିଏସ୍ ଅରୁଣ ବୋଥ୍ରା ମଧ୍ୟ ଏକାଧିକ ପଦବିରେ ଅଛନ୍ତି। ଗୋଟିଏ ଗୋଟିଏ ଜାଗାରେ ଜଣେ ଲୋକଙ୍କୁ ଏତେ ଦିନ ରଖାଯାଉଛି କିପରି? ଏଇଟା କ’ଣ ମୋ ସରକାର? ଏଇଟା କ’ଣ ୫-ଟି? ସାଧାରଣ ପ୍ରଶାସନ ବିଭାଗ ଦାୟିତ୍ବରେ ଥିବା ମନ୍ତ୍ରୀ ଏହାର ସ୍ବଷ୍ଟୀକରଣ ଦିଅନ୍ତୁ। ବାଚସ୍ପତି ଏ ନେଇ ନିର୍ଦ୍ଦେଶ ଦେବାକୁ ସେ ଦାବି କରିଥିଲେ।
ବିରୋଧୀ ଦଳ ନେତାଙ୍କ ଉଦ୍ବେଗ ସହ କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର ସହମତ ହୋଇଥିଲେ। ନଗର ଉନ୍ନୟନ ବିଭାଗର ପ୍ରମୁଖ ସଚିବଙ୍କ ବିରୋଧରେ ଅଭିଯୋଗ ଆଣି ନରସିଂହ କହିଥିଲେ, ଜଣେ ସଚିବ ଗୋଟିଏ ବିଭାଗରେ ୯ ବର୍ଷ ରହିବେ କେମିତି? ସେ ମହୋଦୟ ବିଧାୟକମାନଙ୍କ ଫୋନ୍ ରିସିଭ୍ କରନ୍ତି ନାହିଁ। ବୁକ୍ ସର୍କୁଲାର୍-୪୭ ଚୁଲିକୁ ଯାଉ। ସେ କାହାକୁ ଖାତିର କରନ୍ତି ନାହିଁ, କାହା କଥା ଶୁଣନ୍ତି ନାହିଁ। ସେ ବହୁତ ଜିଦ୍ଖୋର। ସେହିପରି ସୁପ୍ରିମ୍କୋର୍ଟଙ୍କ ନିର୍ଦ୍ଦେଶ ଅନୁଯାୟୀ ଶ୍ରୀଜଗନ୍ନାଥ ମନ୍ଦିରର ପୂର୍ଣ୍ଣକାଳୀନ ମୁଖ୍ୟ ପ୍ରଶାସକ ସରକାର ନିଯୁକ୍ତି ଦେବା ଦରକାର। କିନ୍ତୁ ଜଣେ ବ୍ୟକ୍ତି ମୁଖ୍ୟ ପ୍ରଶାସକ ରହି କିପରି ଏତେ ଦିନ ଯୋଗାଣ ବିଭାଗରେ ରହିଛନ୍ତି? ସୁପ୍ରିମକୋର୍ଟଙ୍କ ରାୟକୁ ସରକାର କାହିଁକି ଉଲ୍ଲଂଘନ କରୁଛନ୍ତି? ଗୋଟିଏ ଜାଗାରେ ଏତେ ବର୍ଷ ଧରି ଅଫିସରମାନେ ରହୁଛନ୍ତି କିପରି? କେନ୍ଦୁଝର ଜିଲ୍ଲାପାଳଙ୍କ କଥା ନ କହିବା ଭଲ। ସେଠି ମାଲ୍ ଅଛି, ଖଣି ଅଛି, ତେଣୁ ତାଙ୍କୁ ବଦଳାଯିବନି। କାରଣ ଏ ସରକାର ଖଣି ପଇସାରେ ଚାଲିଛି।
ବିରୋଧୀ ଦଳ ନେତା ଓ କଂଗ୍ରେସ ଦଳ ନେତା ଆଇଏଏସ୍ ଅଧିକାରୀମାନଙ୍କ ବିରୋଧରେ ଗର୍ଜୁଥିଲା ବେଳେ ବିରୋଧୀ ଦଳ ସଭ୍ୟମାନେ ତାହାକୁ ସମର୍ଥନ କରିଥିଲେ।
ସେପଟେ ବିରୋଧୀଙ୍କ ଅଭିଯୋଗର ଜବାବ ଦେବାକୁ ଯାଇ ରାଜସ୍ୱ ମନ୍ତ୍ରୀ ପ୍ରମିଳା ମଲ୍ଲିକ କହିଛନ୍ତି, ଯଦି ଅଫିସରମାନେ ଭଲ କାମ କରୁଛନ୍ତି ତେବେ ସେମାନଙ୍କୁ ନିର୍ଦ୍ଦିଷ୍ଟ ଅଞ୍ଚଳରେ ରଖିବାରେ ଅସୁବିଧା କ’ଣ? ଏଥିରେ କୌଣସି କ୍ଷତି ନାହିଁ ବୋଲି ପ୍ରମିଳା କହିଛନ୍ତି।
