ଭୁବନେଶ୍ୱର ( ସତ୍ୟପାଠ ବ୍ୟୁରୋ ): ଅଖିଳେଶ ଯାଦବ ଚାହିଁଲେ, ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ସରକାର ୧୫ଦିନ ମଧ୍ୟରେ କ୍ଷମତାଚ୍ୟୁତ ହେବେ। ଏପରି ମନ୍ତବ୍ୟ ଦେଇଛନ୍ତି ସମାଜବାଦୀ ପାର୍ଟିର ନେତା ତଥା ୟୁପିର ପୂର୍ବତନ ମନ୍ତ୍ରୀ ନାରଦ ରାୟ । ସେ ଆହୁରି କହିଛନ୍ତି ଯେ ଯୋଗୀଙ୍କ ଉପରେ ୧୫୦ରୁ ଅଧିକ ଭାଜପା ବିଧାୟକ ଅସନ୍ତୁଷ୍ଟ ଅଛନ୍ତି। ରାଜ୍ୟ ସରକାରଙ୍କ ମନ୍ତ୍ରୀମାନେ ମଧ୍ୟ ଅସନ୍ତୁଷ୍ଟ ରହିଛନ୍ତି ବୋଲି ସେ ଦାବି କରିଛନ୍ତି।ଗଣମାଧ୍ୟମ ସହ ଆଲୋଚନା ବେଳେ ନାରଦ ରାୟ କହିଛନ୍ତି ଯେ ଯୋଗୀଙ୍କ ସରକାର ଆଉ ବେଶୀଦିନ ଚାଲିବ ନାହିଁ। ଖୁବ୍ ଶୀଘ୍ର ଏହାର ପତନ ହେବାକୁ ଯାଉଛି।
ସେ ଆହୁରି କହିଛନ୍ତି ଆପଣ ଉପମୁଖ୍ୟମନ୍ତ୍ରୀ ବ୍ରଜେଶ ପାଠକଙ୍କୁ ଉପରୁ ଭଲ ବୋଲି ଦେଖୁଛନ୍ତି। କିନ୍ତୁ ତାଙ୍କ ମନରେ ବହୁ ଦୁଃଖ ରହିଛି। ଯେଉଁ ଦିନ ତାଙ୍କୁ ଭାଜପା ସଂସଦୀୟ ବୋର୍ଡରୁ ହଟାଇ ଦିଆଯାଇଥିଲା ସେହି ଦିନ ସେ ନୀତିନ ଗଡକରୀଙ୍କୁ ଭେଟିଥିଲେ। ଭାଜପା ନିଜେ ଏହାର ସଦସ୍ୟଙ୍କୁ ଏଭଳି ଆଘାତ ଦେଇଛି। ତେଣୁ ରାଜ୍ୟରେ ଯୋଗୀ ସରକାରଙ୍କ ଉପରେ ଏହାର ପ୍ରଭାବ ପଡ଼ିବ। ରାଜ୍ୟରେ ଭାଜପା ସରକାର ଅଳ୍ପ ଦିନ ଚାଲିବ ବୋଲି ନାରଦ ମତ ପ୍ରକାଶ କରିଛନ୍ତି।
ଯୋଗୀ ମୁଖ୍ୟମନ୍ତ୍ରୀ ହେବା ଦିନଠାରୁ ରାଜ୍ୟ ଭାଜପାର କୌଣସି ନେତା ତାଙ୍କୁ ପସନ୍ଦ କରୁ ନାହାନ୍ତି ବୋଲି ନାରଦ ଦାବି କରିଛନ୍ତି। ୫୦ କୋଟି ଲାଞ୍ଚ ନେଇ ରାଜ୍ୟରେ ଆରଟିଓ ପୋଷ୍ଟିଂ କରାଯାଉଛି । ଯେତେବେଳେ ସରକାରଙ୍କ ଏଭଳି ଅବସ୍ଥା ଆସେ ସେତେବେଳେ ରାଜ୍ୟରେ ସରକାରଙ୍କ ଶେଷ ଦିନ ପାଖେଇ ଆସିଥାଏ ବୋଲି ସେ କହିଛନ୍ତି।
