ଭୁବନେଶ୍ୱର ( ସତ୍ୟପାଠ ବ୍ୟୁରୋ ): ବେଆଇନ ଖଣି ଦୁର୍ନୀତି ମାମଲାରେ ଝାଡଖଣ୍ଡ ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କୁ ପ୍ରବର୍ତ୍ତନା ନିର୍ଦ୍ଦେଶାଳୟ(ଇଡି) ସମନ୍ ଜାରି କରିଛି। ଆସନ୍ତାକାଲି ଅର୍ଥାତ୍ ଗୁରୁବାର ତାଙ୍କୁ ଇଡି କାର୍ଯ୍ୟାଳୟରେ ହାଜର ହେବାକୁ କୁହାଯାଇଛି। ଆଗରୁ ଏହି ସମାନ ମାମଲାରେ ସୋରେନଙ୍କ ଘନିଷ୍ଠ ସହଯୋଗୀ ପଙ୍କଜ ମିଶ୍ରାଙ୍କୁ ଇଡି ଗିରଫ କରିସାରିଛି।
ଗତ ଜୁଲାଇ୮ରେ ପଙ୍କଜ ମିଶ୍ରା ଏବଂ ତାଙ୍କ ବ୍ୟବସାୟ ସହ ଜଡ଼ିତ ଝାଡ଼ଖଣ୍ଡର ୧୮ଟି ସ୍ଥାନ ରେଡ୍ କରିଥିଲା ଇଡି । ଗତ ମାର୍ଚ୍ଚରେ ମିଶ୍ରା ଏବଂ ଅନ୍ୟମାନଙ୍କ ବିରୋଧରେ ପ୍ରିଭେନସନ୍ ଅଫ୍ ମନି ଲଣ୍ଡରିଂ ଆକ୍ଟ (PMLA) ଅନୁଯାୟୀ ଇଡି ମାମଲା ଦାୟର କରିବା ପରେ ଅନୁସନ୍ଧାନ ଆରମ୍ଭ ହୋଇଥିଲା। ଅଭିଯୁକ୍ତ ପଙ୍କଜ ମିଶ୍ରା ବେଆଇନ ଭାବେ ୪୨ କୋଟି ଟାଙ୍କାର ସମ୍ପତି ହାତେଇଥିବା ଇଡି ଜାଣିବାକୁ ପାଇଛି। ମୁଖ୍ୟମନ୍ତ୍ରୀ ହେମନ୍ତ ସୋରେନ୍ଙ୍କ ପ୍ରତିନିଧି ଭାବେ ଝାଡ଼ଖଣ୍ଡର ସାହେବଗଞ୍ଜ ଅଞ୍ଚଳରୁ ବର୍ହୈତ୍ର ବିଧାୟକ ପଙ୍କଜ ମିଶ୍ରା ରାଜ୍ୟରେ ଅଖଣ୍ଡ ରାଜନୈତିକ କ୍ଷମତାର ଅଧିକାରୀ ଅଟନ୍ତି।
ସେ ତାଙ୍କର ସହଯୋଗୀମାନଙ୍କ ମାଧ୍ୟମରେ ସାହେବଗଞ୍ଜ ଓ ତତ୍ସଂଲଗ୍ନ ଅଞ୍ଚଳରେ ବେଆଇନ ଖଣି ବ୍ୟବସାୟ ଏବଂ ନଦୀ ଘାଟ ନିୟନ୍ତ୍ରଣ କରନ୍ତି। ଏହି ଦୁର୍ନୀତିରେ ପ୍ରାୟ ୧୦୦୦ କୋଟି ଟଙ୍କା ହେରଫେର କରାଯାଇଥିବାର ପ୍ରମାଣ ମିଳିଥିବା ଇଡି ପକ୍ଷରୁ କୁହାଯାଇଛି । ପଙ୍କଜ ମିଶ୍ରା ଜଣେ ବିଧାୟକ ହୋଇଥିବାବେଳେ ସୋରେନ୍ଙ୍କ ଅତ୍ୟନ୍ତ ଅନୁଗତ ଅଟନ୍ତି । ତେଣୁ କ୍ଷମତାର ଅପବ୍ୟବହାର କରି ପଙ୍କଜ ଖଣି ଦୁର୍ନୀତିର ମୁଖ୍ୟ ସୂତ୍ରଧର ଥିଲେ ବୋଲି ଅଭିଯୋଗ ହୋଇଛି । ପଙ୍କଜ ଏହି ଦୁର୍ନୀତିରେ ପ୍ରାୟ ୪୨ କୋଟି ଟଙ୍କା ଆତ୍ମସାତ୍ କରିଥିବା ଇଡି ପକ୍ଷରୁ କୁହାଯାଇଛି ।
ଏହି ମାମଲାରେ ଇଡି ପକ୍ଷରୁ ଦେଶର ୪୭ଟି ସ୍ଥାନରେ ଚଢଉ କରାଯାଇ ଏପର୍ଯ୍ୟନ୍ତ ନଗଦ ୫.୩୪ କୋଟି ଟଙ୍କା ଜବତ କରାଯାଇଥିବାବେଳେ ୧୩.୩୨ କୋଟି ଟଙ୍କାର ବ୍ୟାଙ୍କ ଆକାଉଣ୍ଟକୁ ସିଲ୍ କରାଯାଇଛି । ଏହି ମାମଲାରେ ପଙ୍କଜଙ୍କୁ ଜୁଲାଇ ୧୯ରେ, ବଚ୍ଚୁ ଯାଦବଙ୍କୁ ଅଗଷ୍ଟ ୪ରେ ଏବଂ ପ୍ରେମ ପ୍ରକାଶଙ୍କୁ ଅଗଷ୍ଟ ୨୫ରେ ଇଡି ଗିରଫ କରିଛି।
