ଭୁବନେଶ୍ୱର ( ସତ୍ୟପାଠ ବ୍ୟୁରୋ ): ଉତ୍ତରପ୍ରଦେଶରେ ଜହୁରାବାଦର ବିଧାୟକ ତଥା ସୁଭାସପାର ରାଷ୍ଟ୍ରୀୟ ସଭାପତି ଓମ୍ ପ୍ରକାଶ ରାଜଭାରଙ୍କୁ “Y” ବର୍ଗ ସୁରକ୍ଷା ପ୍ରଦାନ କରାଯାଇଛି। ସରକାରଙ୍କ ନିର୍ଦ୍ଦେଶରେ ଏହି ସୁରକ୍ଷା ଦିଆଯାଇଛି। କେନ୍ଦ୍ର ସରକାରଙ୍କ ଏହି ନିଷ୍ପତ୍ତି ପରେ ରାଜନୈତିକ ମହଲରେ ଅନେକ କଳ୍ପନାଜଳ୍ପନା ଚାଲିଛି। ଯାହାକି ଆସନ୍ତା ଲୋକସଭା ନିର୍ବାଚନରେ ଉତ୍ତରପ୍ରଦେଶରେ କିଛି ନୂଆ ରାଜନୈତିକ ସମୀକରଣ ଦେଖିବାକୁ ମିଳିବ ବୋଲି କୁହାଯାଉଛି।
ସୂଚନାଯୋଗ୍ୟ ଯେ, ଗତ ବିଧାନସଭା ନିର୍ବାଚନରେ ଓପି ରାଜଭାର ସମାଜବାଦୀ ପାର୍ଟି ସହ ମେଣ୍ଟ କରି କେନ୍ଦ୍ର ସରକାରଙ୍କ ଉପରେ କଡ଼ା ଆକ୍ରମଣ କରିଥିଲେ।ତେବେ କିଛି ଦିନ ହେବ ଓପି ରାଜଭରଙ୍କ ଶୈଳୀ ବଦଳି ଯାଇଥିଲା। ବର୍ତ୍ତମାନ ଅଖିଳେଶ ଓ ରାଜଭରଙ୍କ ମଧ୍ୟରେ ଦୂରତା ବଢୁଥିବା ଭଳି ଲାଗୁଚି। ରାଷ୍ଟ୍ରପତି ନିର୍ବାଚନ ପୂର୍ବରୁ ରାଜଭର ଅମିତ ଶାହାଙ୍କୁ ମଧ୍ୟ ଭେଟିଥିଲେ। ରାଷ୍ଟ୍ରପତି ନିର୍ବାଚନରେ ଅଖିଳେଶ ଯାଦବଙ୍କ ବିରୋଧରେ ବିଦ୍ରୋହ କରି ରାଜଭର ଏନଡିଏ ପ୍ରାର୍ଥୀ ଦ୍ରୌପଦୀ ମୁର୍ମୁଙ୍କୁ ସମର୍ଥନ କରିଥିଲେ। ସେ ଲକ୍ଷ୍ନୌରେ ଏନଡିଏର ରାଷ୍ଟ୍ରପତି ପ୍ରାର୍ଥୀ ମୁର୍ମୁଙ୍କ ପାଇଁ ଆୟୋଜିତ ଏକ ରାତ୍ରୀଭୋଜନରେ ମଧ୍ୟ ଯୋଗ ଦେଇଥିଲେ। କେବଳ ଏତିକି ନୁହେଁ, ଆଜମଗଡ ଏବଂ ରାମପୁର ଲୋକସଭା ଉପ-ନିର୍ବାଚନରେ ଏସପିର ପରାଜୟ ପରେ ଓପି ରାଜଭର ସମାଜବାଦୀ ପାର୍ଟି ବିରୋଧରେ ଅନେକ ବିବୃତ୍ତି ଦେଉଛନ୍ତି।
