ଭୁବନେଶ୍ୱର (ସତ୍ୟପାଠ ବ୍ୟୁରୋ): ଦିଲ୍ଲୀର ପୂର୍ବତନ ଉପ ମୁଖ୍ୟମନ୍ତ୍ରୀ ତଥା ଆମ୍ ଆଦମୀ ପାର୍ଟିର ବରିଷ୍ଠ ନେତା ମନୀଷ ସିସୋଦିଆଙ୍କୁ ଦୀର୍ଘ ଦିନ ଧରି ଜେଲରେ ରଖିବା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ତାଙ୍କ ବିରୋଧରେ ଅନେକ ମିଥ୍ୟା ମାମଲା ରୁଜୁ କରିବାକୁ ଯୋଜନା କରୁଛନ୍ତି ବୋଲି ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ଵାଲ ଅଭିଯୋଗ କରିଛନ୍ତି। ଦିଲ୍ଲୀ ସରକାରଙ୍କ ଫିଡବ୍ୟାକ୍ ୟୁନିଟ୍ (ଏଫ୍ବିୟୁ) ଦୁର୍ନୀତି ମାମଲାରେ ସିବିଆଇ ସିସୋଦିଆ ଏବଂ ଅନ୍ୟମାନଙ୍କ ନାମରେ ଏଫଆଇଆର ରୁଜୁ କରିବା ପରେ କେଜ୍ରିଓ୍ଵାଲ ଏଭଳି ମନ୍ତବ୍ୟ ଦେଇଛନ୍ତି।
କେଜ୍ରିଓ୍ଵାଲ ଟୁଇଟ୍ କରି କହିଛନ୍ତି, ମନୀଷଙ୍କ ବିରୋଧରେ ଅନେକ ମିଥ୍ୟା ମାମଲା ରୁଜୁ କରିବା ଏବଂ ତାଙ୍କୁ ଦୀର୍ଘ ସମୟ ଧରି ହେପାଜତରେ ରଖିବା ପ୍ରଧାନମନ୍ତ୍ରୀଙ୍କ ଯୋଜନା ଦେଶ ପାଇଁ ଦୁଃଖଦାୟକ!
ସେପଟେ ଏଫ୍ବିୟୁ ଦୁର୍ନୀତି ନେଇ ସିବିଆଇ କହିଛି ଯେ ଦିଲ୍ଲୀ ସରକାରଙ୍କ ଅଧୀନରେ ଥିବା ବିଭିନ୍ନ ବିଭାଗ ଏବଂ ସ୍ୱୟଂଶାସିତ ସଂସ୍ଥା, ଅନୁଷ୍ଠାନ ଏବଂ ସଂସ୍ଥାଗୁଡ଼ିକର କାର୍ଯ୍ୟକଳାପ ସମ୍ପର୍କରେ ପ୍ରାସଙ୍ଗିକ ସୂଚନା ଏବଂ କାର୍ଯ୍ୟକ୍ଷମ ମତାମତ ସଂଗ୍ରହ କରିବା ଏବଂ ଟ୍ରାପ୍ କେସ୍ କରିବା ପାଇଁ ଆପ୍ ସରକାର ୨୦୧୫ରେ ଫିଡବ୍ୟାକ୍ ୟୁନିଟ୍ ଗଠନ କରିବାକୁ ପ୍ରସ୍ତାବ ଦେଇଥିଲେ। ଏବଂ ଏହି ଗୁପ୍ତ ସେବା ଖର୍ଚ୍ଚ ପାଇଁ ୧ କୋଟି ଟଙ୍କାର ବ୍ୟବସ୍ଥା କରିଥିଲେ; ୨୦୧୬ରେ ଏହି ୟୁନିଟ୍ କାର୍ଯ୍ୟ ଆରମ୍ଭ କରିଥିଲା।
