ପ୍ରଧାନ ମନ୍ତ୍ରୀ ନରେନ୍ଦ୍ର ମୋଦୀ ଆଜି ପୂର୍ବାହ୍ନରେ ଦିଲ୍ଲୀର ଲାଲକିଲ୍ଲାଠାରେ ୭୪ ତମ ସ୍ୱାଧୀନତା ଦିବସ ଅବସରରେ ଜାତୀୟ ପତାକା ଉତ୍ତୋଳନ କରିବା ସହିତ ଦେଶବାସୀଙ୍କୁ ସମ୍ବୋଧନ କରିଛନ୍ତି । କରୋନା ମହାମାରୀ ଯୋଗୁଁ ଏ ବର୍ଷ ନିରାଡ଼ଂବରରେ ପାଳନ ହୋଇଛି ସ୍ୱାଧୀନତା ଦିବସ । ଏଥିରେ ସମସ୍ତେ ପ୍ରତ୍ୟକ୍ଷ ଭାବରେ ଯୋଗ ଦେଇ ପାରିନଥିବାରୁ ପ୍ରଧାନମନ୍ତ୍ରୀ ଦୁଃଖ ପ୍ରକାଶ କରିଥିବା ବେଳେ କରୋନା ଯୋଦ୍ଧାଙ୍କୁ ଅନେକ ପ୍ରଶଂସା କରିଛନ୍ତି । ସେହିପରି ଦେଶର ବିକାଶ ପାଇଁ କାମ କରୁଥିବା ଚାଷୀ, ସୈନିକ,ବ୍ୟବସାୟୀ, ଯୁବପୀଢି ଓ ମହିଳା ମାନଙ୍କୁ ମହାନ ବୋଲି କହିଛନ୍ତି ।
ଆହୁରି ମଧ୍ୟ କହିଛନ୍ତି ମହାମାରୀ କାରୋନା ପାଇଁ ଦେଶ ସମସ୍ୟା ଭିତରେ ଗତି କରୁଛି । କିନ୍ତୁ କରୋନା ପାଇଁ ଦେଶର ବୈଜ୍ଞାନିକ କାମ କରୁଛନ୍ତି । ୩ଟି ଟୀକା ପାଇଁ ଦେଶରେ ପରୀକ୍ଷା ଚାଲିଛି ବୋଲି ମୋଦି କହିଛନ୍ତି । ଟୀକା ଆସିଲେ ଲୋକଙ୍କ ପାଖକୁ ତୁରନ୍ତ ପହଂଚାଇବାର ବ୍ୟବସ୍ଥା କରାଯିବ । ପ୍ରତ୍ୟେକ ଭାରତୀୟଙ୍କ ପାଖରେ ଟୀକା ପହଂଚିବ ଏବଂ ବୈଜ୍ଞାନିକମାନଙ୍କ ସଫଳତା ପରେ ହିଁ ପରବର୍ତ୍ତୀ ପଦକ୍ଷେପ ଗ୍ରହଣ କରାଯିବ ।
ପ୍ରଧାନମନ୍ତ୍ରୀ ଆହୁରି କହିଛନ୍ତି ଯେ, ୧୯୨ରୁ ୧୮୪ ଦେଶ ଭାରତକୁ ସଂଯୁକ୍ତ ରାଷ୍ଟ୍ରରେ ଅସ୍ଥାୟୀ ସଦସ୍ୟତା ପାଇଁ ସମର୍ଥନ କରିଛନ୍ତି । ବିଶ୍ୱରେ ଭାରତ କିପରି ନିଜର ସ୍ୱତନ୍ତ୍ର ପରିଚୟ ସୃଷ୍ଟି କରିଛି, ଏହି ସଂଖ୍ୟା ହେଉଛି ତାହାର ଉଦାହରଣ । ଭାରତ ସବୁବେଳେ ପଡ଼ୋଶୀ ଦେଶ ସହ ଉତ୍ତମ ସମ୍ପର୍କ ରଖିବା ପାଇଁ ଉଦ୍ୟମ ଜାରି ରଖିଛି । ଆମ ସମ୍ପର୍କକୁ ସର୍ବଦା ସୁରକ୍ଷା, ବିକାଶ ଓ ବିଶ୍ୱାସର ସହଭାଗିତାର ସହ ଆଗକୁ ବଢିବାରେ ବିଶ୍ୱାସ କରିଥାଉ ।
ଏହା ସହ ସାର୍ବଭୌମତ୍ୱ ରକ୍ଷା ପାଇଁ ଦେଶ ବଦ୍ଧପରିକର ବୋଲି ମୋଦି କହିଛନ୍ତି । ଲଦାଖାରେ ଆମ ଯବାନଙ୍କ ବୀରତ୍ୱ ବିଶ୍ୱ ଦେଖିଛି । ଆତଙ୍କବାଦ ଓ ବିସ୍ତାରବାଦକୁ ଉଚିତ୍ ଜବାବ ଦେବ ଭାରତ । ଏଲଓସିରୁ ଏଲଏସି ଯାଏଁ ଯବାନ ସଜାଗ ଅଛନ୍ତି । ପଡ଼ୋଶୀ ସହ ସହାବସ୍ଥାନ ଚାହେଁ ଭାରତ । ଯିଏ ଯେଉଁପରି ତାକୁ ସେହିପରି ସମ୍ମାନ ବ୍ୟବହାର ପାଇଁ ସେନା ପ୍ରସ୍ତୁତ ଅଛନ୍ତି ବୋଲି ମୋଦି କହିଛନ୍ତି ।
