ଭୁବନେଶ୍ୱର(ସତ୍ୟପାଠ ବ୍ୟୁରୋ): ବରିଷ୍ଠ ବିଜେପି ନେତା ଦେବେନ୍ଦ୍ର ଫଡନାଭିସ୍ ଏନସିପି ମୁଖ୍ୟ ଶରଦ ପାୱାରଙ୍କ ବାସଭବନରେ ହୋଇଥିବା ଆକ୍ରମଣକୁ ଏକ ବଡ ଭୁଲ ବୋଲି କହିଛନ୍ତି। ସେ କହିଛନ୍ତି ଯେ ଏହା ପୋଲିସ ବିଭାଗ ଏବଂ ଗୁପ୍ତଚର ଏଜେନ୍ସିର ଏକ ବଡ଼ ବିଫଳତା । ଏହାର ଯାଞ୍ଚ କରାଯାଉ। ବାସ୍ତବରେ, ମହାରାଷ୍ଟ୍ର ରାଜ୍ୟ ସଡକ ପରିବହନ ନିଗମର ୧୦୦ ରୁ ଅଧିକ କର୍ମଚାରୀ ସେମାନଙ୍କ ଦାବି ପାଇଁ ହଠାତ୍ ଶରଦ ପାୱାରଙ୍କ ବଙ୍ଗଳା ଉପରେ ଆକ୍ରମଣ କରିଥିଲେ। ଏହି ଘଟଣା ଘଟିବା ପରେ ଶରଦ ପାୱାର ଘରେ ଉପସ୍ଥିତ ଥିଲେ। ଏହି ସମୟରେ ପାୱାରଙ୍କ ଝିଅ ଏବଂ ଲୋକସଭା ସଦସ୍ୟ ସୁପ୍ରିୟା ସୁଲେ ବିକ୍ଷୋଭକାରୀଙ୍କୁ ମନାଇବା ପାଇଁ ଚେଷ୍ଟା କରିଥିଲେ ମଧ୍ୟ ସେମାନେ ତାହା ଶୁଣିନଥିଲେ । ଏହା ପରେ ପୋଲିସ ସେମାନଙ୍କୁ ଆୟତ୍ତ୍ୱ କରିଥିଲା ।
ଏନେଇ ପାୱାର କହିଛନ୍ତି ଯେ ଉତ୍ତେଜିତ ଏମଏସଆରଟିସି କର୍ମୀମାନେ ଏକ ଚେତନାହୀନ ନେତୃତ୍ୱ ଦ୍ୱାରା ବିଭ୍ରାନ୍ତ ହୋଇଥିଲେ। ସେପଟେ ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମମତା ବାନାର୍ଜୀ ମଧ୍ୟ ଶରଦ ପାୱାରଙ୍କ ବାସଭବନରେ ହୋଇଥିବା ଆକ୍ରମଣକୁ ନିନ୍ଦା କରିଛନ୍ତି। ମମତା ବାନାର୍ଜୀ ଟ୍ୱିଟ୍ କରି କହିଛନ୍ତି ଯେ ଭାରତର ଅନ୍ୟତମ ବରିଷ୍ଠ ରାଜନୈତିକ ବ୍ୟକ୍ତିବିଶେଷ ଶରଦ ପାୱାରଙ୍କ ବାସଭବନରେ ହୋଇଥିବା ଆକ୍ରମଣକୁ ନିନ୍ଦା କରୁଛୁ। ଦୋଷୀଙ୍କ ବିରୋଧରେ କଠୋର କାର୍ୟ୍ୟାନୁଷ୍ଠାନ ଗ୍ରହଣ କରିବାକୁ ମହାରାଷ୍ଟ୍ରର ମୁଖ୍ୟମନ୍ତ୍ରୀଙ୍କ ବିବୃତ୍ତିକୁ ମୁଁ ସ୍ୱାଗତ କରୁଛି। ବାସ୍ତବରେ ମହାରାଷ୍ଟ୍ର ମୁଖ୍ୟମନ୍ତ୍ରୀ ଉଦ୍ଧବ ଠାକରେ ଏହି ଆକ୍ରମଣର ଅପରାଧୀଙ୍କ ବିରୋଧରେ କଠୋର କାର୍ୟ୍ୟାନୁଷ୍ଠାନ ଗ୍ରହଣ କରିବାକୁ ପୋଲିସକୁ ନିର୍ଦ୍ଦେଶ ଦେଇଛନ୍ତି। ଏହା ପରେ ରାଜ୍ୟ ପୋଲିସ ୧୦୭ ଜଣଙ୍କ ବିରୋଧରେ ମାମଲା ରୁଜୁ କରିଥିଲା।
