(ସତ୍ୟପାଠ ବ୍ୟୁରୋ) ଭୁବନେଶ୍ୱର : ବିରୋଧୀ ଦଳଗୁଡ଼ିକୁ ଏକଜୁଟ ରଖିବା ପାଇଁ ଚଳିତ ମୌସୁମୀ ଅଧିବେଶନରେ ସକ୍ରିୟ ଥିବା କଂଗ୍ରେସ ଆଗକୁ ଏହି ଭାବମୂର୍ତ୍ତିକୁ ବଜାୟ ରଖିବାକୁ ଚେଷ୍ଟା ଆରମ୍ଭ କରିଛି। ରାହୁଲ ଗାନ୍ଧୀଙ୍କ ପରେ ବର୍ତ୍ତମାନ ଦଳର ସଭାପତି ସୋନିଆ ଗାନ୍ଧୀ ଆସନ୍ତା ସପ୍ତାହରେ ପୁଣି ଥରେ ବିରୋଧୀ ଦଳର ନେତା ମାନଙ୍କୁ ଭେଟିବାକୁ ଯାଉଛନ୍ତି। ଏଥିମଧ୍ୟରେ ଟିଏମସି ସୁପ୍ରିମୋ ମମତା ବାନାର୍ଜୀ, ଏନସିପି ମୁଖ୍ୟ ଶରଦ ପାୱାର, ଶିବସେନା ମୁଖ୍ୟ ଉଦ୍ଧବ ଠାକରେ, ଡିଏମକେ ସଭାପତି ଏମ.କେ ଷ୍ଟାଲିନଙ୍କ ସମେତ ଅନ୍ୟାନ୍ୟ ବରିଷ୍ଠ ନେତାଙ୍କ ନାମ ଅନ୍ତର୍ଭୁକ୍ତ କରାଯାଇଛି। ଝାଡଖଣ୍ଡର ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କୁ ମଧ୍ୟ ଏହି ବୈଠକକୁ ଡକାଯାଇଛି। ଅଗଷ୍ଟ ୨୦ ରେ ଏହି ବୈଠକ ଅନୁଷ୍ଠିତ ହେବ ଏବଂ କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧୀ ଏହାକୁ ଭିଡିଓ କନଫରେନ୍ସିଂ ମାଧ୍ୟମରେ ସମ୍ବୋଧିତ କରିବେ। ସୋନିଆ ଗାନ୍ଧୀଙ୍କ ଏହି ପଦକ୍ଷେପ ସୂଚାଇ ଦେଇଛି ଯେ ୨୦୨୪ ଲୋକସଭା ନିର୍ବାଚନରେ ବିଜେପି ବିରୋଧରେ ବିରୋଧୀ ଦଳ ଗଠବନ୍ଧନରେ କଂଗ୍ରେସ ଏକ ବଡ଼ ଭୂମିକା ଗ୍ରହଣ କରିବାକୁ ଇଚ୍ଛୁକ।
ଏହି ଅନଲାଇନ୍ ବୈଠକ ମାଧ୍ୟମରେ କଂଗ୍ରେସ ଆଗାମୀ ଦିନରେ ନୂଆଦିଲ୍ଲୀରେ ବିରୋଧୀ ଦଳର ନେତାମାନଙ୍କୁ ରାତ୍ରୀ ଭୋଜନ କିମ୍ବା ମଧ୍ୟାହ୍ନ ଭୋଜନ ପାଇଁ ନିମନ୍ତ୍ରଣ କରିବେ। ଏନଡିଟିଭିର ଖବର ଅନୁଯାୟୀ କଂଗ୍ରେସ ଏହି ଏକତାକୁ ଆଗକୁ ନେବାକୁ ଚାହୁଁଛି ଏବଂ ଭବିଷ୍ୟତରେ ଅନ୍ୟାନ୍ୟ ବିରୋଧୀ ଦଳ ମଧ୍ୟ ଯୋଡିବାକୁ ଉଦ୍ୟମ ଜାରି ରଖିଛି। ଶିବସେନା ନେତା ସଞ୍ଜୟ ରାଉତ ଗୁରୁବାର କହିଛନ୍ତି ଯେ କଂଗ୍ରେସ ସଭାପତି ସୋନିଆ ଗାନ୍ଧୀ ଅଗଷ୍ଟ ୨୦ ରେ କଂଗ୍ରେସ ଶାସିତ ରାଜ୍ୟର ମୁଖ୍ୟମନ୍ତ୍ରୀ ଏବଂ ନେତାମାନଙ୍କୁ ଭେଟିବେ। ସଂସଦର ମୌସୁମୀ ଅଧିବେଶନରେ ଏକତା ମଧ୍ୟରେ ୧୫ ବିରୋଧୀ ଦଳ ପେଗାସସ୍ ଭଳି ପ୍ରସଙ୍ଗରେ ସରକାରଙ୍କୁ ଏକ ସ୍ବରରେ ଟାର୍ଗେଟ କରି ଥିଲେ ।
ସୂଚନା ଥାଉକି ନିକଟରେ ବରିଷ୍ଠ କଂଗ୍ରେସ ନେତା କପିଲ ସିବଲ ମଧ୍ୟ ତାଙ୍କ ଜନ୍ମଦିନରେ ବିରୋଧୀ ଦଳର ନେତାମାନଙ୍କୁ ନିମନ୍ତ୍ରଣ କରିଥିଲେ। ଏଥିରେ ବିରୋଧୀ ଦଳର ବହୁ ନେତା ଯୋଗ ଦେଇଥିଲେ । ଏହି ବୈଠକରେ ବିଜୁ ଜନତା ଦଳର ସାଂସଦ ପିନାକୀ ମିଶ୍ର ମଧ୍ୟ ଯୋଗ ଦେଇଥିଲେ। ସଂସଦର ମୌସୁମୀ ଅଧିବେଶନରେ ବିରୋଧୀଦଳର ନେତାଙ୍କ ମଧ୍ୟରେ ଏକତା ଦେଖିବାକୁ ମିଳିଥିଲା। ବିରୋଧୀ ମଧ୍ୟ ସରକାରଙ୍କୁ ଘେରିବାରେ ସଫଳ ହୋଇଥିଲେ। ଏଭଳି ପରିସ୍ଥିତିରେ ବିରୋଧୀଙ୍କ ଏକତା ବଜାୟ ରଖିବା ପାଇଁ କଂଗ୍ରେସ ଯୋଜନା କରିଛି।
