ଭୁବନେଶ୍ୱର୧୭/୧୨(ସତ୍ୟପାଠ ବ୍ୟୁରୋ): ମୁମ୍ବାଇର ଘାଟକୋପର ଅଞ୍ଚଳରେ ଭୟାବହ ଅଗ୍ନିକାଣ୍ଡ । ଏଥିରେ ଜଣଙ୍କର ମୃତ୍ୟୁ ଘଟିଥିବା ବେଳେ ୨ ଜଣ ଗୁରୁତର ହୋଇଛନ୍ତି । ସେହିପରି ନିଶ୍ବାସ ନେବାରେ ଅସୁବିଧା ହେତୁ ୨୨ ଜଣଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି । ସୂଚନା ମୁତାବକ, ବିଶ୍ୱାସ ନାମକ କୋଠାରେ ଥିବା ଜୁନୋ ପିଜା ହୋଟେଲର ମିଟର ରୁମରୁ ଏହି ଅଗ୍ନିକାଣ୍ଡ ବ୍ୟାପିଛି ।
ଅଗ୍ନିଶମ ବାହିନୀ ଅନୁଯାୟୀ ନିଆଁକୁ ନିୟନ୍ତ୍ରଣକୁ ନିଆଯାଇଛି । ନିଆଁ ମିଟର ରୁମରେ ଆରମ୍ଭ ହୋଇଥିଲା ଏବଂ ଏହି ବିଲ୍ଡିଂରେ ଏକ ଡାକ୍ତରଖାନା ଅଛି । ଏଠାକୁ ଧୂଆଁ ପ୍ରବେଶ କରିବା କାରଣରୁ ସେଠାରେ ଥିବା ରୋଗୀଙ୍କୁ ଅନ୍ୟ ସ୍ଥାନକୁ ସ୍ଥାନାନ୍ତର କରାଯାଇଛି । ଅଗ୍ନିକାଣ୍ଡର କାରଣ ଏପର୍ଯ୍ୟନ୍ତ ଜଣା ପଡିନାହିଁ ।
ସୂଚନାଯୋଗ୍ୟ ଯେ, କେନ୍ଦ୍ରୀୟ ମୁମ୍ବାଇର ୬୧ ମହଲା କୋଠାରେ ଅଗ୍ନିକାଣ୍ଡ ଘଟିବାର ଦୁଇ ଦିନ ପରେ ଏହି ଘଟଣା ସାମ୍ନାକୁ ଆସିଛି । ଡିସେମ୍ବର ୧୫ ରେ, ସକାଳ ୧୧.୩୦ରେ କରୀ ରୋଡ୍ ଅଞ୍ଚଳରେ ଅବସ୍ଥିତ ‘ୱାନ୍ ଅଭିଗ୍ନା ପାର୍କ’ କୋଠାର ୨୨ ତମ ମହଲାରୁ ଆରମ୍ଭ ହୋଇଥିବା ନିଆଁ ରାତି ୧.୫୦ ରେ ନିୟନ୍ତ୍ରଣକୁ ନିଆଯାଇଥିଲା । ନିଆଁ ଲିଭାଇବା ବେଳେ ଦୁଇଜଣ ଅଗ୍ନିଶମ କର୍ମଚାରୀ ସାମାନ୍ୟ ଆହତ ହୋଇଥିଲେ ।
