ଭୁବନେଶ୍ୱର ( ସତ୍ୟପାଠ ବ୍ୟୁରୋ ): ଦିଲ୍ଲୀ ଅବକାରୀ ଦୁର୍ନୀତି ମାମଲାରେ ଉପମୁଖ୍ୟମନ୍ତ୍ରୀ ମନୀଷ ସିସୋଦିଆଙ୍କୁ ସିବିଆଇ ସୋମବାର ପଚରାଉଚରା ଜାରି ରଖିଛି। ତାଙ୍କୁ କେନ୍ଦ୍ରୀୟ ଅନୁସନ୍ଧାନ ବ୍ୟୁରୋ ପକ୍ଷରୁ ଆଜି ହାଜର ହେବାପାଇଁ ସମନ କରାଯାଇଥିଲା । ସିବିଆଇ ତାଙ୍କୁ ଡକାଇବା ପରେ ଆମ୍ ଆଦମୀ ପାର୍ଟି (ଆପ) ସମଗ୍ର ମାମଲାକୁ ଦ୍ୱିତୀୟ ସ୍ୱାଧୀନତା ସଂଗ୍ରାମ ବୋଲି କହିଛି ଓ ତାଙ୍କୁ ମିଥ୍ୟା ମାମଲାରେ ତାଙ୍କୁ ଗିରଫ କରାଯିବ ବୋଲି ଅଭିଯୋଗ କରିଛି।
ଅନ୍ୟପକ୍ଷରେ ବିଜେପି ମୁଖପାତ୍ର ଗୌରବ ଭାଟିଆ ରବିବାର କହିଛନ୍ତି ଯେ, ମନୀଷ ସିସୋଦିଆ ହେଉଛନ୍ତି ଦୁର୍ନୀତିର ଏଜେଣ୍ଟ ଯିଏ ଅରବିନ୍ଦ କେଜ୍ରିୱାଲଙ୍କ ଟ୍ରେଜେରୀ ଭରୁଛନ୍ତି।
ତେବେ ଆଜି ମନୀଷ ସିବିଆଇ ନିକଟରେ ହାଜର ହେବା ପୂର୍ବରୁ ନିଜ ମା’ଙ୍କ ଆଶୀର୍ବାଦ ନେଇ ଦଳୀୟ କର୍ମୀଙ୍କ ସହ ଏକ ବିଶାଳ ଶୋଭାଯାତ୍ରାରେ ସିବିଆଇ କାର୍ଯ୍ୟାଳୟକୁ ଆସିଥିଲେ। ଏହାପରେ ସିବିଆଇ କାର୍ଯ୍ୟାଳୟ ସମ୍ମୁଖରେ ହିଁ ଆପ କର୍ମୀ ମାନେ ବିକ୍ଷୋପ ପ୍ରଦର୍ଶନ କରିଥିଲେ। ତେବେ ବର୍ତ୍ତମାନ ମିଳିଥିବା ସୂଚନା ଅନୁସାରେ ବରିଷ୍ଠ ଆମ୍ ଆଦମୀ ଦଳର ନେତା ତଥା ସାଂସଦ ସଞ୍ଜୟ ସିଂଙ୍କୁ ଦିଲ୍ଲୀ ପୋଲିସ ଉଠାଇ ନେଇଛି। ସେ ବିରୋଧ ପ୍ରଦର୍ଶନ କରୁଥିବା ସମୟରେ ପୋଲିସ ତାଙ୍କୁ ଅଟକ ରଖିଥିବା ସୂଚନା ମିଳିଛି। ଦିଲ୍ଲୀ ପୋଲିସ ଆପ ନେତାମାନଙ୍କୁ ବିରୋଧ ପ୍ରଦର୍ଶନ ସ୍ଥାନ ଖାଲି କରିବାକୁ କହିଥିଲା, କିନ୍ତୁ ସଞ୍ଜୟ ସିଂ କହିଥିଲେ ଯେ ମନୀଷ ସିସୋଦିଆ ଯେପର୍ଯ୍ୟନ୍ତ ଭିତରେ ଅଛନ୍ତି ଆମେ ସେ ପର୍ଯ୍ୟନ୍ତ ଏଠାରୁ ହଟିବୁ ନାହିଁ।
ଆମ୍ ଆଦମୀ ପାର୍ଟିର ମୁଖପାତ୍ର ସୌରଭ ଭରଦ୍ୱାଜ କହିଛନ୍ତି ଯେ ମନୀଷ ସିସୋଦିଆ ଗିରଫ ହେବା ପରେ ଗୁଜରାଟରେ ଆପର ଅଭିଯାନ ମଜବୁତ ହେବ। ସ୍ୱାଧୀନତାର ଗୀତ ଗାନ କରାଯାଉଛି। ଇଡି କିମ୍ବା ସିବିଆଇ ସହିତ ଆମର କୌଣସି ଅଭିଯୋଗ ନାହିଁ କାରଣ ସେମାନେ ଯାହା କରୁଛନ୍ତି କେନ୍ଦ୍ର ସରକାରଙ୍କ ନିର୍ଦ୍ଦେଶରେ କରୁଛନ୍ତି ବୋଲି ସେ କହିଛନ୍ତି।
ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଅଭିଯୋଗ କରିଛନ୍ତି ଯେ, ମନୀଷ ସିସୋଦିଆଙ୍କୁ ଏକ ମିଥ୍ୟା ମାମଲାରେ ଯୋଡ଼ା ଯାଉଛି ଓ ଗୁଜୁରାଟ ନିର୍ବାଚନ ଫଳାଫଳ ନ ଆସିବା ପର୍ଯ୍ୟନ୍ତ ସେ ଜେଲରେ ରହିବେ ତେଣୁ ସେ ଗୁଜରାଟ ନିର୍ବାଚନରେ ପ୍ରଚାର କରିବାକୁ ଯିବେ ନାହିଁ।
ମନୀଷ ସିସୋଦିଆଙ୍କୁ ପଚରାଉଚରା କରାଯାଉଥିବା ବେଳେ ଅନ୍ୟପଟେ ସିବିଆଇ କାର୍ଯ୍ୟାଳୟ ବାହାରେ ଭାରି ପୋଲିସ ଫୋର୍ସ ମୁତୟନ କରାଯାଇଛି।
ସୂଚନାଯୋଗ୍ୟ ଯେ, ଅଗଷ୍ଟ ମାସରେ ମନୀଷ ସିସୋଦିଆଙ୍କ ଘରେ ସିବିଆଇ ଚଢ଼ାଉ କରିଥିଲା। ଯାହା ଉପରେ ମନୀଷ କହିଥିଲେ, ‘ଅନୁସନ୍ଧାନରେ ପୂର୍ଣ୍ଣ ସହଯୋଗ ଦେବ ଯାହା ଦ୍ବାରା ଶୀଘ୍ର ସତ୍ୟ ପ୍ରକାଶ ପାଇବ। ବର୍ତ୍ତମାନ ପର୍ଯ୍ୟନ୍ତ ମୋ ବିରୋଧରେ ଅନେକ ମାମଲା ଦାୟର କରାଯାଇଛି କିନ୍ତୁ କିଛି ବାହାରି ନାହିଁ। ଏଥିରୁ କିଛି ମଧ୍ୟ ବାହାରକୁ ଆସିବ ନାହିଁ। ଦେଶରେ ଭଲ ଶିକ୍ଷା ପାଇଁ ମୋର କାମ ବନ୍ଦ ହୋଇପାରିବ ନାହିଁ।”
