ଭୁବନେଶ୍ୱର ( ସତ୍ୟାପଠ ବ୍ୟୁରୋ ): ପୁଣି ଥରେ ଭାରତକୁ ଟାର୍ଗେଟ କଲେ ନେପାଳର ପୂର୍ବ ପ୍ରଧାନମନ୍ତ୍ରୀ କେ.ପି ଶର୍ମା ଓଲି। ନେପାଳରେ ନିର୍ବାଚନୀ ପ୍ରଚାର ସମୟରେ ସେ କହିଛନ୍ତି ଯେ, ଶାସନକୁ ଫେରିଲେ ଭାରତ ଅଧିଗ୍ରହଣ କରିଥିବା କାଲାପାନି, ଲିପୁଲେଖ ଓ ଲିମ୍ପିୟାଧୁରା ନେପାଳକୁ ଫେରିବ । ଆମେ ଇଞ୍ଚେ ବି ଜାଗା ଭାରତକୁ ଛାଡ଼ିବୁ ନାହିଁ ବୋଲି ଓଲି କହିଛନ୍ତି।
ସୂଚନା ଅନୁସାରେ, ପଶ୍ଚିମ ନେପାଳ ନିକଟବର୍ତ୍ତୀ ଭାରତ ସୀମାବର୍ତ୍ତୀ ଧାରଚୁଲା ଜିଲ୍ଲାରେ ନିଜ କମ୍ୟୁନିଷ୍ଟ ପାର୍ଟିର ପ୍ରଚାର କରୁଥିବା ସମୟରେ ଓଲି କହିଛନ୍ତି ଯେ, ସରକାରକୁ ଆସିଲେ ଆମେ କାଲାପାନି, ଲିପୁଲେଖ ଓ ଲିମ୍ପିୟାଧୁରାକୁ ଫେରାଇ ଆଣି ଦେଶରେ ମିଶାଇବୁ ।ଆସନ୍ତା ୨୦ ତାରିଖରେ ହେବାକୁ ଥିବା ନିର୍ବାଚନରେ ଆମ ଦଳ ଫେରିଲେ ଉକ୍ତ ଅଞ୍ଚଳ ସବୁ ପୁଣି ଥରେ ଦେଶକୁ ଫେରିବ ।
ସେପଟେ ନେପାଳ କଂଗ୍ରେସ ଅଧ୍ୟକ୍ଷ ତଥା ପ୍ରଧାନମନ୍ତ୍ରୀ ଶେର ବାହାଦୁର ଦେଓବା କହିଛନ୍ତି ଯେ, କୁଟନୈତିକ ନୀତି ଆଧାରରେ କବଜା ହୋଇଥିବା ନେପାଳର ଅଞ୍ଚଳକୁ ଫେରାଇ ଆଣିବାକୁ ଚେଷ୍ଟା ଜାରି ରହିଛି। ଏହାକୁ ନେଇ ରାଜନୀତି କରିବା ଉଚିତ ନୁହେଁ । ରାଷ୍ଟ୍ରୀୟ ଅଖଣ୍ଡତାକୁ ନିର୍ବାଚନୀ ଏଜେଣ୍ଡାରେ ସାମିଲ ନ କରିବାକୁ ନେପାଳର ପୂର୍ବତନ ପ୍ରଧାନମନ୍ତ୍ରୀ ଡା. ବାବୁରାମ ଭଟ୍ଟାରାଇ ମଧ୍ୟ ଓଲିଙ୍କୁ ପରାମର୍ଶ ଦେଇଛନ୍ତି।
ସୂଚନାଯୋଗ୍ୟ, ଭାରତ ପକ୍ଷରୁ ଗତ ୨୦୨୦ ୮ ମେ ମାସରେ ଉତ୍ତରାଖଣ୍ଡର ଲିପୁଲେଖ ସହ ଧାରଚୁଲାର ସଂଯୋଗ କରିବା ନିମନ୍ତେ ସଡ଼କ ପଥ କାର୍ଯ୍ୟକ୍ଷମ ହେଲା। ଏହାପରେ ୨ ଦେଶ ମଧ୍ୟରେ ସମ୍ବନ୍ଧରେ ତିକ୍ତତା ଆସିଲା। ସେତେବେଳେ ଓଲି ନେପାଳ ପ୍ରଧାନମନ୍ତ୍ରୀ ଥିଲେ। ଏହି ରାସ୍ତା ନେପାଳକୁ ଛୁଇଁକରି ଯାଉଥିବାରୁ ନେପାଳ ପକ୍ଷରୁ ଏହାକୁ ବିରୋଧ କରାଯାଇଥିଲା। କିଛି ଦିନ ପରେ ନେପାଳ ପକ୍ଷରୁ ଲିପୁଲେଖ, କାଲାପାନି ଓ ଲିମ୍ପିୟାଧୁରାକୁ ନିଜ ମାନଚିତ୍ରରେ ସ୍ଥାନ ଦିଆଗଲା। ଏହାକୁ ନେଇ ଭାରତ ତୀବ୍ର ପ୍ରତିକ୍ରିୟା ପ୍ରକାଶ କଲା। ଓଲି ପ୍ରଧାନମନ୍ତ୍ରୀ ପଦରୁ ହଟିବା ପରେ ପୁଣି ଥରେ ଭାରତ-ନେପାଳ ସମ୍ପର୍କରେ ସୁଧାର ଆସିଛି। ହେଲେ ଏବେ ପୁଣି ଥରେ ଓଲି ପୁରୁଣା ପ୍ରସଙ୍ଗକୁ ଉଠାଇ ୨ ଦେଶ ମଧ୍ୟରେ ଥିବା ସମ୍ପର୍କକୁ ବିଗାଡ଼ିବାକୁ ଚେଷ୍ଟା କରିଛନ୍ତି।
