ମୁମ୍ବାଇ: ମହାରାଷ୍ଟ୍ରର ପୂର୍ବତନ ମୁଖ୍ୟମନ୍ତ୍ରୀ ଉଦ୍ଧବ ଠାକରେ ନିର୍ବାଚନ ଆୟୋଗଙ୍କ ଉପରେ ଖପା। ସେ ତାଙ୍କୁ ଚିଠି ଲେଖି ନିର୍ବାଚନ ପ୍ରତୀକ ଦେବାରେ ତାଙ୍କ ପ୍ରତି ଭେଦଭାବ କରାଯାଇଥିବା ଅଭିଯୋଗ କରିଛନ୍ତି ।
ଖବର ଅନୁଯାୟୀ, ଉଦ୍ଧବ ଠାକରେ ଚିଠିରେ ୧୨ଟି ବିନ୍ଦୁରେ କିଭଳି ପକ୍ଷପାତିତା ହୋଇଛି ତାହା ଉଲ୍ଲେଖ କରିଛନ୍ତି | ଏହି ସବୁ ବିନ୍ଦୁରେ ସେ ନିର୍ବାଚନ ଆୟୋଗଙ୍କ ବିରୋଧରେ ଗୁରୁତର ଅଭିଯୋଗ ଆଣିଛନ୍ତି। ଅଂଧେରୀ ପୂର୍ବ ଉପ-ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବା ପାଇଁ ନିର୍ବାଚନ ଆୟୋଗ ଉଦ୍ଧବଙ୍କ ଦଳକୁ ନିର୍ବାଚନ ପ୍ରତୀକ ଭାବେ ‘ଜଳୁଥିବା ମଶାଲ’ ଚିହ୍ନ ପ୍ରଦାନ କରିଥିଲେ। ଏହା ବ୍ୟତୀତ ତାଙ୍କ ଦଳର ନାମ ‘ଶିବସେନା- ଉଦ୍ଧବ ବାଲାସାହେବ ଠାକରେ’ ଦିଆଯାଇଥିଲା । ଏଥି ସହିତ ଏକନାଥ ସିନ୍ଦେଙ୍କ ଦଳକୁ ନିର୍ବାଚନ ପ୍ରତୀକ ଭାବେ ୨ଟି ଖଣ୍ଡା ଓ ଢ଼ାଲ ଚିହ୍ନ ବଣ୍ଟନ କରିଥିଲେ |
ତେବେ ଉଦ୍ଧବଙ୍କ ଦଳ ନିର୍ବାଚନ ଆୟୋଗଙ୍କୁ ଲେଖିଥିବା ଏକ ଚିଠିରେ ଅଭିଯୋଗ ହୋଇଛି ଯେ ଟିମ୍ ସିନ୍ଦେ ଏହାର ତାଲିକା ଦାଖଲ କରିବା ପୂର୍ବରୁ ନିର୍ବାଚନ ଆୟୋଗ ୱେବସାଇଟରେ ଠାକରେଙ୍କ ଦଳର ନାମ ଏବଂ ପ୍ରତୀକକୁ ଅପଲୋଡ୍ କରିଦେଇଥିଲେ | ଯାହାଦ୍ୱାରା ଟିମ୍ ସିନ୍ଦେ ଏହାକୁ କପି କରି ନିଜର ପ୍ରତୀକ ବାବଦରେ ଆୟୋଗଙ୍କୁ ଜଣାଇଥିଲା | ଉଦ୍ଧବଙ୍କ ଟିମ ଅଭିଯୋଗ କରିଛନ୍ତି ଯେ ଆଶ୍ଚର୍ଯ୍ୟର କଥା ଯେ ଶିବସେନା- ଉଦ୍ଧବ ବାଲାସାହେବ ଠାକରେ ଦଳକୁ ପ୍ରତୀକ ଚିହ୍ନ ଦିଆଯିବା ପରେ ଏହାକୁ ୱେବସାଇଟରୁ ହଟାଇ ଦିଆଯାଇଥିଲା ।
ଉଲ୍ଲେଖ ଥାଉ କି ଶିବସେନାର ଦୁଇ ପ୍ରତିଦ୍ୱନ୍ଦ୍ୱୀ ଦଳ ସୋମବାର ନିର୍ବାଚନ ଆୟୋଗଙ୍କଠାରୁ ନୂଆ ନାମ ପାଇଥିଲେ । ଉଦ୍ଧବଙ୍କ ଗୋଷ୍ଠୀ ଦଳର ନାମ ଶିବସେନା (ଉଦ୍ଧବ ବାଲାସାହବେ ଠାକ୍ରେ) ଏବଂ ଏକନାଥ ସିନ୍ଦେଙ୍କ ଗୋଷ୍ଠୀ ଦଳର ନାମ ବାଲାସାହେବାଞ୍ଚି ଶିବସେନା ରଖାଯାଇଥିଲା । ଏହି ଦୁଇନାମକୁ ନିର୍ବାଚନ କମିସନ ସ୍ବୀକୃତି ଦେଇଥିଲେ । ଫଳରେ ଏମାନେ ଉପରୋକ୍ତ ନାମରେ ପରିଚିତ ହେବେ।
