କଟକ(ସତ୍ୟପାଠବ୍ୟୁରୋ) : ପୁଣି ଥରେ ସମ୍ପର୍କରେ ରକ୍ତ ଛିଟା। ସାମାନ୍ୟ ବଚସାକୁ ନେଇ ଟାଙ୍ଗିଆରେ ହାଣି ସ୍ତ୍ରୀକୁ ହତ୍ୟା କରିଛି ନୃଶଂସ ସ୍ବାମୀ। ମୃତ ମହିଳା ହେଲେ ରୋଜାଲିନ। କଟକ ନେମାଳ ଥାନା ସହଦେବପୁର ଗାଁର ଶୈଳେନ୍ଦ୍ର ମଳିକ ଗତକାଲି ବିଳମ୍ବିତ ରାତି ୨ଟାରେ ସ୍ତ୍ରୀ ରୋଜାଲିନକୁ ଟାଙ୍ଗିଆରେ ହାଣି ନିର୍ମମ ଭାବେ ହତ୍ୟା କରିଛି । ସୂଚନା ମୁତାବକ ସ୍ୱାମୀ ସ୍ତ୍ରୀ ରାତିରେ ଶୋଇଥିବା ସମୟରେ ହଠାତ ସ୍ୱାମୀ ସ୍ତ୍ରୀଙ୍କ ମଧ୍ୟରେ ବଚସା ହୋଇଥିଲା। ହଠାତ ଘରୁ ଟାଙ୍ଗିଆ ବାହାର କରି ସ୍ତ୍ରୀକୁ ଆକ୍ରମଣ କରିଥିଲା ସ୍ୱାମୀ ଶୈଳେନ୍ଦ୍ର । ଅନ୍ୟ ଘରେ ବାପା ବୋଉ ଏବଂ ଭାଇ ଶୋଇଥିଲାବେଳେ କବାଟ ବାଡେଇବା ସହିତ ଅନ୍ୟ ସଦସ୍ୟମାନଙ୍କୁ ହାଣିବ ବୋଲି କହିବା ସହିତ ଘରୁ ବାହାରକୁ ଯାଇ ଫେରାର ହୋଇଯାଇଛି।
ଅନ୍ୟପଟେ ରୋଜାଲିନଙ୍କ ପରିବାର ଲୋକ ଏହି ହତ୍ୟାକାଣ୍ଡରେ ଶୈଳେନ୍ଦ୍ରଙ୍କ ପରିବାର ଲୋକ ସାମିଲ ଥିବା ଅଭିଯୋଗ କରିଥିଲାବେଳେ ଶୈଳେନ୍ଦ୍ରଙ୍କ ବାପା ମା ଏହି ଘଟଣା ଏକ ଆକସ୍ମିକ ଏବଂ ହତ୍ୟାର କାରଣ ସେ ଜାଣିନାହାନ୍ତି ବୋଲି ସଫେଇ ଦେଇଛନ୍ତି। ଗତ ସ୍ୱାମୀ ସ୍ତ୍ରୀ ମଧ୍ୟରେ ସୁସମ୍ପର୍କ ଥିଲେ ହେଁ ହଠାତ ଏଭଳି ହତ୍ୟାକୁ ନେଇ କାରଣ ଖୋଜୁଛି ନେମାଳ ପୋଲିସ। ରୋଜାଲିନଙ୍କ ଶବ ବ୍ୟବଛେଦ ଏବଂ ଅଭିଯୁକ୍ତ ଶୈଳେନ୍ଦ୍ର ଧରାପଡିଲେ ସତ୍ୟାସତ୍ୟ ଜଣାପଡିବ ବୋଲି ନେମାଳ ପୋଲିସ ସୂଚନା ଦେଇଛି।
