ମହାକାଳପଡ଼ା : କେନ୍ଦ୍ରାପଡ଼ା ମହାକାଳପଡ଼ା ସରପଞ୍ଚ ଚାମେଲି ଓଝା ବିବାଦ ଘନେଇବାରେ ଲାଗିଛି। ଚାମେଲିଙ୍କୁ ଆକ୍ରମଣ, ତାଙ୍କ ମୋବାଇଲ୍ ଛଡ଼ାଇବା, ତାଙ୍କୁ ଓ ତାଙ୍କ ଭାଇଙ୍କୁ ଖରାପ ବ୍ୟବହାର ପ୍ରସଙ୍ଗରେ ମହାକାଳପଡ଼ା ପୋଲିସ ଜଣଙ୍କୁ ଗିରଫ କରିଛି। ଗିରଫ ଅଭିଯୁକ୍ତ ହେଲେ ପାର୍ଥସାରଥୀ ସାମନ୍ତରାୟ। ସେପଟେ ମେଡିକାଲ୍‌ରେ କଡ଼ା ପହରା ଭିତରେ ଚାମେଲିଙ୍କୁ ଚିକିତ୍ସା କରାଯାଉଛି। ମହାକାଳପଡ଼ା ବ୍ଲକ ତିଖିରି ଗ୍ରାମ ପଞ୍ଚାୟତର ସରପଞ୍ଚ ଚାମେଲି ଓଝା ଅସୁସ୍ଥ ହୋଇ ବର୍ତ୍ତମାନ ସେ କେନ୍ଦ୍ରାପଡ଼ା ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି ହୋଇ ଚିକିତ୍ସିତ ହେଉଛନ୍ତି । କଟକ ବିଧାୟିକା ସୋଫିଆ ଫିର୍ଦ୍ଦୋସ ଡାକ୍ତରଖାନାରେ ପହଞ୍ଚି ସରପଞ୍ଚ ଚାମେଲି ଓଝାଙ୍କୁ ଭେଟିବା ସହ ତାଙ୍କ ସ୍ୱାସ୍ଥ୍ୟାବସ୍ଥା ସମ୍ପର୍କରେ ପଚାରି ବୁଝିଛନ୍ତି । ସେ କହିଛନ୍ତି , ଚାମେଲି ଜଣେ ଜନପ୍ରତିନିଧି । ତାଙ୍କୁ ଯେଉଁ ଅଧିକାରୀ ଏବଂ ପୁଲିସମାନେ ଦୁର୍ବ୍ୟବହାର କରିଛନ୍ତି ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯାଉ । ଏହାପରେ ବିଧାୟିକା ଜିଲ୍ଲାପାଳଙ୍କ ବାସଭବନ କାର୍ଯ୍ୟାଳୟରେ ପହଞ୍ଚି ଜିଲ୍ଲାପାଳ ରଘୁରାମ ଆର. ଆୟାର ଏବଂ ଏସପି ସିଦ୍ଧାର୍ଥ କଟାରିଆଙ୍କୁ ଭେଟିଥିଲେ। ଏହି ସାକ୍ଷାତକାର ସମୟରେ ସରପଞ୍ଚଙ୍କ ସମ୍ପର୍କିତ ସମଗ୍ର ଘଟଣା ଏବଂ ଆନୁଷଙ୍ଗିକ ବିଷୟରେ ସେ ପ୍ରଶାସନିକ ଅଧିକାରୀଙ୍କ ସହ ଆଲୋଚନା କରିଥିବା ଜଣାପଡ଼ିଛି ।