‘ମିସିଂ ଲିଙ୍କ୍’ ପ୍ରକଳ୍ପ ବିବାଦରେ ଫଡନାଭିସ୍ ଓ ସଞ୍ଜୟ ମୁହାଁମୁହିଁ
ମୁମ୍ବାଇ (ସତ୍ୟପାଠ ବ୍ୟୁରୋ): ମୁମ୍ବାଇ-ପୁଣେ ଏକ୍ସପ୍ରେସୱେର ୭,୦୦୦ କୋଟି ବ୍ୟୟର ମହତ୍ୱାକାଂକ୍ଷୀ “ମିସିଂ ଲିଙ୍କ୍” ପ୍ରକଳ୍ପର ନୂତନ ରାସ୍ତାରେ ପ୍ରଥମ ବର୍ଷାରେ ହିଁ ଭୂସ୍ଖଳନ ଘଟିବା ପରେ ମହାରାଷ୍ଟ୍ରରେ ରାଜନୈତିକ ଝଡ଼ ସୃଷ୍ଟି ହୋଇଛି। ଏହି ତ୍ରୁଟିକୁ ନେଇ ବିରୋଧୀଙ୍କ ସମାଲୋଚନା ଓ ସୋସିଆଲ ମିଡିଆ ଟ୍ରୋଲିଂରେ କ୍ରୋଧିତ ହୋଇ ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ୍ ସମାଲୋଚକମାନଙ୍କୁ “ଭଡ଼ାଟିଆ ଘୋଡ଼ା” ଭଳି ଆପତ୍ତିଜନକ ଶବ୍ଦରେ ତାଚ୍ଛଲ୍ୟ କରିଥିଲେ। ଏହାର ପ୍ରତିବାଦରେ ଶିବସେନା ସାଂସଦ ସଞ୍ଜୟ ରାଉତ ତୀବ୍ର ଅସନ୍ତୋଷ ପ୍ରକାଶ କରି ଏହାକୁ ମହାରାଷ୍ଟ୍ର ସଂସ୍କୃତିର ଘୋର ଅପମାନ ବୋଲି କହିଛନ୍ତି ଏବଂ ମୁଖ୍ୟମନ୍ତ୍ରୀଙ୍କୁ ନିଃସର୍ତ୍ତ କ୍ଷମା ମାଗିବାକୁ ଦାବି କରିଛନ୍ତି। ରାଉତ ଅଭିଯୋଗ କରିଛନ୍ତି ଯେ, ମୋଦୀ, ଶାହ ଓ ଫଡନାଭିସ୍ ମହାରାଷ୍ଟ୍ରର ଛବି ଖରାପ କରୁଛନ୍ତି। ୫୦ କୋଟିରେ ବିଧାୟକ କିଣି ଅନୈତିକ ସରକାର ଗଢ଼ିବା ଏବଂ ଦୁର୍ନୀତି ଯୋଗୁଁ ଶିବାଜୀ ମହାରାଜଙ୍କ ପ୍ରତିମୂର୍ତ୍ତି ଭୁଶୁଡ଼ିବା ରାଜ୍ୟ ପାଇଁ ପ୍ରକୃତ ଲଜ୍ଜାର ବିଷୟ। ଫଡନାଭିସଙ୍କୁ ଜଣେ ହତାଶ ନେତା ଭାବେ ବର୍ଣ୍ଣନା କରି ସେ ଖୁବ୍ ଶୀଘ୍ର ତାଙ୍କୁ ଆରଏସଏସର ପ୍ରକୃତ ଇତିହାସ ବହି ଉପହାର ଦେବେ ବୋଲି କହିଛନ୍ତି।
