(ସତ୍ୟପାଠ ବ୍ୟୁରୋ) ଭୁବନେଶ୍ୱର : ଉତ୍ତର ପ୍ରଦେଶ ଜିଲ୍ଲା ପଞ୍ଚାୟତ ନିର୍ବାଚନରେ ବିଜେପିକୁ ବଡ ସଫଳତା ମିଳିଛି। ୭୫ଟି ଆସନରୁ ଦଳ ୬୭ ଆସନରେ ବିଜୟୀ ହୋଇଛି । ସମାଜବାଦୀ ପାର୍ଟି ମାତ୍ର ୫ଟି ଆସନରେ ବିଜୟୀ ହୋଇଛି। ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟ ନାଥ ଦଳର ଏହି ବିଜୟକୁ ନେଇ ପ୍ରତିକ୍ରିୟା ରଖି କହିଛନ୍ତି ଯେ , ଏଥିରୁ ଜଣାପଡ଼ୁଛି ରାଜ୍ୟ ସରକାରଙ୍କର ଶାସନ ପ୍ରତି ଲକମାନଙ୍କର କେତେ ବିଶ୍ୱାସ ରହିଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ୟୁପି ସିଏମ ଯୋଗୀ ଆଦିତ୍ୟନାଥ ବିଜୟୀ ପ୍ରାର୍ଥୀଙ୍କୁ ଅଭିନନ୍ଦନ ଜଣାଇଛନ୍ତି। ତେବେ ସପା ମୁଖିଆ ଅଖିଳେଶ ଯାଦବ ଅଭିଯୋଗ କରିଛନ୍ତି ଯେ ବିଜେପି ନିର୍ବାଚନରେ ପରାଜୟକୁ ବିଜୟରେ ପରିଣତ କରିବା ପାଇଁ ଅପହରଣ ଏବଂ ବଳ ପ୍ରୟୋଗ କରିଛି। ଦଳର ବିଜୟକୁ ନେଇ ପ୍ରଧାନମନ୍ତ୍ରୀ ମୋଦି ଲେଖିଛନ୍ତି, “ୟୁପି ଜିଲ୍ଲା ପଞ୍ଚାୟତ ନିର୍ବାଚନରେ ବିଜେପିର ଚମତ୍କାର ବିଜୟ ହେଉଛି ଜନତା ଜନାର୍ଦ୍ଦନ ବିକାଶ, ଜନସେବା ଏବଂ ଆଇନର ଶାସନ ପାଇଁ ଦେଇଥିବା ଆଶୀର୍ବାଦ। ଏଥିପାଇଁ ଶ୍ରେୟ ମୁଖ୍ୟମନ୍ତ୍ରୀ ଯୋଗୀ ଜିଙ୍କ ନୀତି ଏବଂ ଅକ୍ଲାନ୍ତ ପରିଶ୍ରମ ଦଳୀୟ କର୍ମୀଙ୍କ କାର୍ଯ୍ୟ। ଏଥିପାଇଁ ସରକାର ଏବଂ ବିଜେପି ସଂଗଠନକୁ ହାର୍ଦ୍ଦିକ ଅଭିନନ୍ଦନ। ” ପ୍ରଧାନମନ୍ତ୍ରୀ ବିଜୟ ପାଇଁ ଶ୍ରେୟ ଦେଇଥିବାବେଳେ ଯୋଗୀ ଆଦିତ୍ୟନାଥ ଏଥିପାଇଁ ପ୍ରଧାନମନ୍ତ୍ରୀଙ୍କୁ ଧନ୍ୟବାଦ ଜଣାଇଛନ୍ତି। ସେ ଲେଖିଛନ୍ତି, “ଉତ୍ତର ପ୍ରଦେଶ ଜିଲ୍ଲା ପଞ୍ଚାୟତ ନିର୍ବାଚନରେ ବିଜେପି ଐତିହାସିକ ବିଜୟ ହେଉଛି ପ୍ରଧାନମନ୍ତ୍ରୀଙ୍କ ଜନମଙ୍ଗଳକାରୀ ଯୋଜନାର ଫଳ। ଏହା ଉତ୍ତର ପ୍ରଦେଶରେ ସୁଶାସନ ଉପରେ ଜନସାଧାରଣଙ୍କ ଆତ୍ମବିଶ୍ୱାସର ପ୍ରକାଶନ। ବିଜୟ ପାଇଁ ଶୁଭକାମନା ଓ ରାଜ୍ୟବାସୀଙ୍କୁ ଧନ୍ୟବାଦ।” ତେବେ ସମାଜବାଦୀ ପାର୍ଟି ଦ୍ବାରା ଜାରି ଏକ ବିବୃତ୍ତିରେ ଦଳର ସଭାପତି ଅଖିଳେଶ ଯାଦବ କହିଛନ୍ତି, “କ୍ଷମତାର ଏପରି ଅପମାନଜନକ ଚେହେରା କେବେ ଦେଖାଯାଇ ନାହିଁ। ଭୋଟର, ପୋଲିସ ଏବଂ ପ୍ରଶାସନ ସାହାଯ୍ୟରେ ବଳପୂର୍ବକ ଏବଂ ତାଙ୍କ ସପକ୍ଷରେ ଭୋଟ୍ କୁ ଅପହରଣ କରି ବିଜେପି ପରାଜୟକୁ ବିଜୟରେ ପରିଣତ କରିବାକୁ ଚେଷ୍ଟା କରିଛି। ” ଅଖିଳେଶ ଯାଦବ ଆହୁରି ମଧ୍ୟ କହିଛନ୍ତି ଯେ ଏହା ଆଶ୍ଚର୍ଯ୍ୟଜନକ ଯେ ଜିଲ୍ଲା ପଞ୍ଚାୟତ ସଦସ୍ୟ ନିର୍ବାଚନରେ ଅଧିକାଂଶ ଫଳାଫଳ ସମାଜବାଦୀ ପାର୍ଟି ସପକ୍ଷରେ ଥିବାବେଳେ ବିଜେପି ପରାଜିତ ହୋଇଥିଲା। ବର୍ତ୍ତମାନ ଜିଲ୍ଲା ପଞ୍ଚାୟତ ସଭାପତି ନିର୍ବାଚନରେ ବିଜେପି କ୍ଷମତାର ଅପବ୍ୟବହାର କରି ସଂଖ୍ୟାଗରିଷ୍ଠତା ହାସଲ କରିଛି।
