ବିଧାନସଭା ନିର୍ବାଚନର ଫଳାଫଳ ପରେ ବଦଳିଥିବା ରାଜନୈତିକ ପରିବେଶ ଯୋଗ ଗୁରୁ ବାବା ରାମଦେବଙ୍କୁ ବି ବଦଳିବାକୁ ବାଧ୍ୟ କରିଛି । ସବୁବେଳେ ନମୋ ନମୋ ଘୋଷି ହେଉଥିବା ବାବା, 2019 ନିର୍ବାଚନରେ ଦେଶର ଆଗାମୀ ପ୍ରଧାନମନ୍ତ୍ରୀ କିଏ ହେବ ସେ ପ୍ରଶ୍ନ ଉପରେ ରଖିଛନ୍ତି ଭିନ୍ନ ମତ । ବାବା ରାମଦେବ କହିଛନ୍ତି, ‘ ଏବେ ଦେଶରେ ରାଜନୈତିକ ସ୍ଥିତି ଦ୍ବନ୍ଦାତ୍ମକ, ମୁଁ କହିପାରିବି ନାହିଁ ଯେ ଆଗାମୀ ପ୍ରଧାନମନ୍ତ୍ରୀ କିଏ ହେବ ବା କିଏ ଦେଶର ନେତୃତ୍ବ ନେବ ?’
ଯୋଗଗୁରୁରୁ ବ୍ୟବସାୟୀ ହେଲେ ବାବା ରାମଦେବ । ନିଜ ରାଜନୈତିକ ମନ୍ତବ୍ୟ ପାଇଁ ସବୁବେଳେ ରାମଦେବ ଚର୍ଚ୍ଚାରେ ଥାଆନ୍ତି ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ପ୍ରଶଂସା କରି କରି ଥକୁ ନ ଥିବା ଯୋଗ ଗୁରୁ ବାବା ରାମଦେବ ଦେଶରେ ପରିବର୍ତ୍ତିତ ରାଜନୈତିକ ପାଣିପାଗକୁ ଦେଖି ଏବେ ନିଜେ ବି ବଦଳି ଯାଇଛନ୍ତି ।
ତାମିଲନାଡୁଙ୍କ ମଦୁରାଇରେ ଯୋଗ ଗୁରୁ ବାବା ରାମଦେବଙ୍କୁ ଦେଶର ଆଗାମୀ ପ୍ରଧାନମନ୍ତ୍ରୀଙ୍କ ନାମକୁ ନେଇ ପ୍ରଶ୍ନ କରାଗଲା । ପ୍ରଥମେ ବାବା ହସିଲେ, ତା ପରେ ଇଂରାଜୀରେ ମାପି ଚୁପି, ବେଶ୍ ସତର୍କତାର ସହ, ପ୍ରଧାନମନ୍ତ୍ରୀ ନାମକୁ ନେଇ ମୌନ ହୋଇଗଲେ । ବାବା ରାମଦେବ କେବଳ ଏତିକି କହିଲେ ଯେ ରାଜନୈତିକ ଚିତ୍ର ସସ୍ପେନ୍ସଫୁଲ୍ ରହିଛି ।
ତେବେ ରାମଦେବ କହିଛନ୍ତି, ‘ଏବେ ମୋର ବ୍ୟକ୍ତିଗତ ଚିନ୍ତାଧାରା ହେଲା, ମୁଁ ସର୍ବଦଳୀୟ କିମ୍ବା ନିର୍ଦ୍ଦଳୀୟ କାହା ସହିତ ନାହିଁ, ନା କୌଣସି ବ୍ୟକ୍ତି ସହ ଅଛି, ନା କୌଣସି ପାର୍ଟି ବିରୋଧରେ ଅଛି ।’’
