ନୂଆଦିଲ୍ଲୀ(ସତ୍ୟପାଠ ବ୍ୟୁରୋ): ଜାନୁଆରୀ ୩୧ରୁ ଦୁଇଟି ପର୍ଯ୍ୟାୟରେ ଆରମ୍ଭ ହେବାକୁ ଯାଉଛି ବଜେଟ ଅଧିବେଶନ । ହେଲେ ଚଳିତ ବର୍ଷର ଅଧିବେଶନ ବର୍ତ୍ତମାନ ସଙ୍କଟରେ ପରିଣତ ହୋଇଛି । କାହିଁକିନା ସଂସଦର ୭୦୦ କର୍ମଚାରୀ ଏହି ବଜେଟ ଅଧିବେଶନ ପୂର୍ବରୁ କରୋନାରେ ସଂକ୍ରମିତ ହୋଇଥିବାର କଥା ସାମ୍ନାକୁ ଆସିଛି । ସେପଟେ ଜାନୁଆରୀ ୪ ପର୍ଯ୍ୟନ୍ତ ସଂସଦରେ ୭୧୮ କର୍ମଚାରୀ କରୋନାରେ ସଂକ୍ରମିତ ହୋଇଥିଲେ । ଯେଉଁଥିରେ କେବଳ ୨୦୪ ଜଣ କର୍ମଚାରୀ ରାଜ୍ୟସଭା ସଚିବାଳୟର ଅଟନ୍ତି । ଏହାକୁ ଦୃଷ୍ଟିରେ ରଖି ବିଶେଷଜ୍ଞମାନେ କହିଛନ୍ତି ଯେ ଏଭଳି ପରିସ୍ଥିତିରେ ବଜେଟ ଅଧିବେଶନ ସମୟରେ ସଂକ୍ରମଣର ସର୍ବାଧିକ ବିପଦ ପକାଇବ । ଫଳରେ ବଜେଟ ଆରମ୍ଭ ପୂର୍ବରୁ ହିଁ ସମସ୍ତଙ୍କୁ ଚିନ୍ତାରେ ପକାଇଛି । ଅନ୍ୟପଟେ ଓମିକ୍ରନ ଓ କରୋନାର ବଢ଼ୁଥିବା ମାମଲା ମଧ୍ୟରେ ହେବାକୁ ଥିବା ବଜେଟ ଅଧିବେଶନ ମଧ୍ୟ ମୌସୁମୀ ଅଧିବେଶନ ୨୦୨୦ ସହିତ ସମାନ ହୋଇପାରେ ।
ସେପ୍ଟେମ୍ବର ୨୦୨୦ରେ ଅନୁଷ୍ଠିତ ମୌସୁମୀ ଅଧିବେଶନରେ କଠୋର କୋଭିଡ ପ୍ରୋଟୋକଲ କାର୍ଯ୍ୟକାରୀ କରାଯାଇଥିଲା । ଏହା ପରେ ପରବର୍ତ୍ତୀ ବଜେଟ ଅଧିବେଶନ, ମୌସୁମୀ ଅଧିବେଶନ ଏବଂ ଶୀତକାଳୀନ ଅଧିବେଶନ ସେମାନଙ୍କର ପୂର୍ବ ନିର୍ଦ୍ଧାରିତ ସମୟ ଅନୁଯାୟୀ ଅନୁଷ୍ଠିତ ହୋଇଥିଲା । ତଥାପି ଏହି ସମୟ ମଧ୍ୟରେ ଶାରୀରିକ ଦୂରତା ଭଳି ନିୟମ ମଧ୍ୟ ପାଳନ କରାଯାଇଥିଲା । ତେଣୁ ଏଥର ବଜେଟ ଅଧିବେଶନରେ ଏହାର ପ୍ରୟୋଗ କରାଯାଇପାରେ ବୋଲି ଅନୁମାନ କରାଯାଉଛି । ଏସବୁ ମଧ୍ୟରେ ବଜେଟ୍ ଅଧିବେଶନ ଘୋଷଣା କରାଯାଇଛି । ସଂକ୍ରମଣ ବୃଦ୍ଧି ହେବାର ଚିନ୍ତା ମଧ୍ୟରେ ଲୋକସଭା ସଚିବାଳୟ ଦ୍ୱାରା ଜାରି କରାଯାଇଥିବା ବଜେଟ ଅଧିବେଶନ ଘୋଷଣା କରାଯାଇଛି।
ଲୋକସଭାର ଅଷ୍ଟମ ଅଧିବେଶନ ୨୦ ଜାନୁୟାରୀ ୨୦୨୨ ରୁ ଆରମ୍ଭ ହେବ । ଏହା ଏପ୍ରିଲ୍ ୮ ରେ ଶେଷ ହେବାର ସମ୍ଭାବନା ଅଛି । ଜାନୁଆରୀ ୩୧ ଦିନ ରାଷ୍ଟ୍ରପତି ରାମନାଥ କୋବିନ୍ଦ ଉଭୟ ସଂସଦ (ଲୋକସଭା ଏବଂ ରାଜ୍ୟସଭା)କୁ ଏକାସାଙ୍ଗରେ ସମ୍ବୋଧିତ କରିବେ । ଏହା ବ୍ୟତୀତ, ୧ ଫେବୃଆରୀ ୨୦୨୨ ରେ କେନ୍ଦ୍ର ବଜେଟ୍ ଉପସ୍ଥାପିତ ହେବ । ମନ୍ତ୍ରଣାଳୟ ଏବଂ ବିଭାଗର ଦାବିକୁ ଅନୁଧ୍ୟାନ କରିବା ଏବଂ ସେମାନଙ୍କ ରିପୋର୍ଟ ପ୍ରସ୍ତୁତ କରିବା ପାଇଁ ସ୍ଥାୟୀ କମିଟିମାନଙ୍କୁ ସମୟ ଦେବା ପାଇଁ, ଫେବୃଆରୀ ୧୧ ରେ ଗୃହକୁ ସ୍ଥଗିତ ରଖାଯିବ ଏବଂ ମାର୍ଚ୍ଚ ୧୪ ରେ ପୁନର୍ବାର ଅନୁଷ୍ଠିତ ହେବ ବୋଲି ସୂଚନା ମିଳିଛି ।
