ଭୁବନେଶ୍ୱର ( ସତ୍ୟପାଠ ବ୍ୟୁରୋ ): ପଶ୍ଚିମବଙ୍ଗ ବିଧାନସଭାରେ କେନ୍ଦ୍ରୀୟ ଏଜେନ୍ସିର ଅତ୍ୟଧିକ କାର୍ଯ୍ୟାନୁଷ୍ଠାନ ବିରୋଧରେ ଏକ ସଂକଳ୍ପ ପାରିତ ହୋଇଛି । ଏହି ସଂକଳ୍ପ ଉପରେ ଉପରେ ଆଲୋଚନା ସମୟରେ ମୁଖ୍ୟମନ୍ତ୍ରୀ ମମତା ବାନାର୍ଜୀ କହିଛନ୍ତି ଯେ ମୁଁ ପ୍ରଧାନମନ୍ତ୍ରୀ ମୋଦୀଙ୍କୁ ଅନୁରୋଧ କରୁଛି ଯେ ସେ ସରକାର ଏବଂ ଦଳର କାର୍ଯ୍ୟକ୍ରମକୁ ମିଶ୍ରଣ କରନ୍ତୁ ନାହିଁ । ଏହା ଦେଶ ପାଇଁ ଭଲ ହେବ ନାହିଁ। ମମତା ଆହୁରି କହିଛନ୍ତି ଯେ ମୁଁ ଭାବୁନାହିଁ ଯେ ପ୍ରଧାନମନ୍ତ୍ରୀ ମୋଦୀ ସିବିଆଇ, ଇଡିର ଅପବ୍ୟବହାର କରୁଛନ୍ତି, କିନ୍ତୁ କିଛି ବିଜେପି ନେତା ନିଜ ସ୍ୱାର୍ଥ ପାଇଁ ଏହା କରୁଛନ୍ତି। ପଶ୍ଚିମବଙ୍ଗ ବିଧାନସଭା ନିୟମ ୧୬୯ ଅନୁଯାୟୀ ‘କେନ୍ଦ୍ରୀୟ ଅନୁସନ୍ଧାନକାରୀ ଏଜେନ୍ସିର ଅତ୍ୟଧିକ କାର୍ଯ୍ୟାନୁଷ୍ଠାନ’ ବିରୋଧରେ ଏକ ସଂକଳ୍ପ ପାରିତ କରିଥିବା ବେଳେ ମମତା ଏହା କହିଛନ୍ତି। ସେ ଆହୁରି ଅଭିଯୋଗ କରିଛନ୍ତି ଯେ ଭାରତୀୟ ଜନତା ପାର୍ଟି (ବିଜେପି) ନେତାଙ୍କ ଏକ ଗୋଷ୍ଠୀ କେନ୍ଦ୍ରୀୟ ଏଜେନ୍ସିମାନଙ୍କୁ ନିଜର ସ୍ୱାର୍ଥ ପାଇଁ ଅପବ୍ୟବହାର କରୁଛନ୍ତି। ସେ କହିଛନ୍ତି ଯେ, ବର୍ତ୍ତମାନର କେନ୍ଦ୍ର ସରକାର ଏକ କ୍ଷମତାସୀନ ଆଚରଣ କରୁଛନ୍ତି। ଏହି ସଂକଳ୍ପ କୌଣସି ନିର୍ଦ୍ଦିଷ୍ଟ ଦଳ ବିରୋଧୀ ନୁହେଁ, ଏହା କେବଳ କେନ୍ଦ୍ରୀୟ ଏଜେନ୍ସିର ଦଳଗତ କାର୍ଯ୍ୟାନୁଷ୍ଠାନ ବିରୁଦ୍ଧରେ ବୋଲି ମମତା କହିଛନ୍ତି।
ଅନ୍ୟପଟେ ଭାରତୀୟ ଜନତା ପାର୍ଟି ବିଧାନସଭା ପାରିତ ହୋଇଥିବା ଏହି ନିଷ୍ପତ୍ତିକୁ ବିରୋଧ କରିଥିଲା। ପଶ୍ଚିମବଙ୍ଗ ବିଧାନସଭାରେ ବିରୋଧୀଦଳର ନେତା ଶୁଭେନ୍ଦୁ ଆଡିକାରୀ କହିଛନ୍ତି ଯେ ସିବିଆଇ ଏବଂ ଇଡି ବିରୋଧରେ ଏଭଳି ପ୍ରସ୍ତାବ ବିଧାନସଭା ନିୟମ ବିରୁଦ୍ଧ ଅଟେ। ତେବେ ଏହି ପ୍ରସ୍ତାବ ସପକ୍ଷରେ ୧୮୯ ଭୋଟ୍ ଏବଂ ବିପକ୍ଷରେ ୬୯ ଟି ଭୋଟ୍ ମିଳିଛି।
