ଭୁବନେଶ୍ୱର ( ସତ୍ୟପାଠ ବ୍ୟୁରୋ ): ବିହାର ମୁଖ୍ୟମନ୍ତ୍ରୀ ନୀତିଶ କୁମାର ଓ ପୂୂୂର୍ବତନ କେନ୍ଦ୍ରମନ୍ତ୍ରୀ ଆରସିପି ସିଂହଙ୍କ ମଧ୍ୟରେ ଆରୋପ ପ୍ରତ୍ୟାରୋପ ଜାରି ରହିଛି । ଆଉ ଏସବୁ ଭିତରେ ଆଜି ପୁଣି ଆରସିପି ସିଂହ ନୀତିଶ କୁମାରଙ୍କୁ ଜୋରଦାର ଟାର୍ଗେଟ କରିଛନ୍ତି । ଆରସିପି କହିଛନ୍ତି ଯେ, ଯେତେବେଳେ ବିହାରରେ ନୀତିଶଙ୍କ ଔକାତ୍ କିଛି ନଥିଲା, ସେତେବେଳେ ତାଙ୍କ ଔକାତ୍ ଢେର ଗୁଣ ଅଧିକ ଥିଲା ଆଉ ଏବେ ମଧ୍ୟ ରହିଛି । ନୀତିଶ କୁମାର ଯେତେବେଳେ କିଛି ନଥିଲେ, ଟିକେଟ୍ ପାଇଁ ବିହାରରେ ବୁଲୁଥିଲେ, ସେତେବେଳେ ୧୯୮୨ ମସିହାରେ ମୁଁ ଆଇଏଏସ ହେଇସାରିଥିଲି । ସେ ମୋର କଣ ପରିଚୟ ଦେବେ? ସେ ନିଜେ ଯେତେବେଳେ ନୌସେନାର ପରୀକ୍ଷାରେ ଫେଲ୍ ହେଇଯାଇଥିଲେ, ସେତେବେଳେ ମୁଁ ଆଇଏଏସ୍ ପରୀକ୍ଷାରେ ପୂରା ଭାରତରେ ୧୩ ନମ୍ବର ରାଙ୍କ୍ ପାଇଥିଲି କହି ନୀତିଶଙ୍କୁ ଟାର୍ଗେଟ୍ କରି କହିଛନ୍ତି ଆରସିପି ସିଂହ ।
ଆରସିପି ଆହୁରି କହିଛନ୍ତି ଯେ, କେହି କାହାକୁ ପରିଚୟ ଦିଅନ୍ତି ନାହିଁ । ଗଣତନ୍ତ୍ରରେ ସମସ୍ତ ନାଗରିକ ସମାନ । ତେବେ ସେ ବିଜେପିରେ ସାମିଲ ହେବା କଥାରେ ଉତ୍ତର ରଖି କହିଥିଲେ ଯେ, ତାଙ୍କ ପାଇଁ ସବୁ ଦ୍ୱାର ଖୋଲା ରହିଛି । ସେ ତାଙ୍କ କାର୍ଯ୍ୟକର୍ତ୍ତାଙ୍କ ସହିତ କଥାବାର୍ତ୍ତା ଜାରି ରଖିଛନ୍ତି । ଆଗାମୀ ଦିନରେ କଣ ହେବ ସେନେଇ ସେ ନିଜେ ମଧ୍ୟ ଜାଣିନାହାଁନ୍ତି ବୋଲି କହିଛନ୍ତି ।
ତେବେ କିଛି ଦିନ ତଳେ ବିହାର ମୁଖ୍ୟମନ୍ତ୍ରୀ ନୀତିଶ କୁମାରଙ୍କୁ ଆରସିପି ସିଂହଙ୍କ ବାବଦରେ ପ୍ରଶ୍ନ କରାଯାଇଥିଲା । ଏହାପରେ ନୀତିଶ କୁମାର ହଠାତ୍ ରାଗିଯାଇଥିଲେ ଆଉ କହିଥିଲେ ଯେ, ଆରସିପି ସିଂହଙ୍କୁ ସେ ରାଜନୀତି ଶିଖାଇଥିଲେ । ପାର୍ଟିରେ ପଦ ମଧ୍ୟ ଦେଇଥିଲେ । ହେଲେ ସେ ବିଜେପି ସାଙ୍ଗରେ ମିଶି ଷଡଯନ୍ତ୍ର କରୁଥିଲେ । ଆଉ ଏହାପରେ ଆଜି ନୀତିଶଙ୍କ ମନ୍ତବ୍ୟର ଉତ୍ତର ଦେଇଛନ୍ତି ଆରସିପି ସିଂହ ।
