ଭୁବନେଶ୍ୱର ( ସତ୍ୟପାଠ ବ୍ୟୁରୋ ): ସଂସଦୀୟ ବୋର୍ଡରୁ କେନ୍ଦ୍ର ମନ୍ତ୍ରୀ ନୀତିନ ଗଡକରୀଙ୍କୁ ହଟାଇବା ନେଇ ଭାରତୀୟ ଜନତା ପାର୍ଟିକୁ ଟାର୍ଗେଟ କରିଛି ଏନସିପି । ଏନେଇ ଏନସିପି କହିଛି ଜଣେ ଦକ୍ଷ ରାଜନେତା ଭାବରେ ଗଡକରୀଙ୍କ ଦକ୍ଷତା ବୃଦ୍ଧି ହେତୁ ତାଙ୍କୁ ବୋର୍ଡରୁ ହଟାଇ ଦିଆଯାଇଛି। ଏନସିପି ମୁଖପାତ୍ର କ୍ଲାଇଡ କ୍ରାଷ୍ଟୋ ଟୁଇଟ କରି କହିଛନ୍ତି ଯେ ଯେତେବେଳେ ଭାଜପାରେ ଜଣେ ନେତାଙ୍କ ଦକ୍ଷତା ଏବଂ ସାମର୍ଥ୍ୟ ବଢ଼ିବ ସେତେବେଳେ ଦଳର ଆଗଧାଡିର ନେତାଙ୍କ ପାଇଁ ଏକ ଚ୍ୟାଲେଞ୍ଜ ସୃଷ୍ଟି ହୋଇଥାଏ।ଏହାପରେ ଭାଜପା ନେତୃତ୍ୱ ପ୍ରତି ଆହ୍ବାନ ସୃଷ୍ଟି କରୁଥିବା ନେତାଙ୍କ ଡେଣା କାଟି ଦେଇଥାଏ। ନେତୃତ୍ୱଙ୍କ ସୁରକ୍ଷା ପାଇଁ ଭାଜପା ଏଭଳି କରିଥାଏ ବୋଲି କ୍ରାଷ୍ଟୋ କହିଛନ୍ତି। ବିଭିନ୍ନ ରାଜନୈତିକ ଦଳର ନେତାଙ୍କ ସହ ଭଲ ସମ୍ପର୍କ ଥିବା ଗଡକରୀ ଏବଂ ମଧ୍ୟପ୍ରଦେଶ ମୁଖ୍ୟମନ୍ତ୍ରୀ ଶିବରାଜ ସିଂ ଚୌହ୍ବାନଙ୍କୁ ଭାଜପା ସଂସଦୀୟ ବୋର୍ଡରେ ସ୍ଥାନ ଦିଆଯାଇ ନାହିଁ। ଜଣେ ଦକ୍ଷ ରାଜନେତା ଭାବରେ ଗଡକରୀଙ୍କର ସ୍ଥିତି ବହୁଗୁଣିତ ହୋଇଛି। ଫଳରେ ନେତୃତ୍ୱଙ୍କ ସ୍ଥିତି ହ୍ରାସର ସଙ୍କେତ ଭାବରେ ଦେଖାଯାଇ ଏଭଳି ପଦକ୍ଷେପ ଗ୍ରହଣ କରାଯାଇଥିବା କ୍ରାଷ୍ଟୋ କହିଛନ୍ତି।
ସୂଚନାଯୋଗ୍ୟ ଯେ, ଗଡକରୀଙ୍କ ପ୍ରତିଦ୍ୱନ୍ଦ୍ୱୀ ଭାବରେ ବିବେଚନା କରାଯାଉଥିବା ମହାରାଷ୍ଟ୍ରର ଉପମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ ଭାଜପାର କେନ୍ଦ୍ରୀୟ ନିର୍ବାଚନ କମିଟିରେ ଅନ୍ତର୍ଭୁକ୍ତ ହୋଇଛନ୍ତି। ଗତ ମାସରେ, ଗଡକରୀ କହିଥିଲେ ଯେ ଜୀବନରେ ଅନେକ କିଛି କରିବାକୁ ଥିବାରୁ ସେ ବେଳେବେଳେ ରାଜନୀତି ଛାଡିବାକୁ ଚାହିଁଥାନ୍ତି। ସାମ୍ପ୍ରତିକ ରାଜନୀତିରେ ସାମାଜିକ ପରିବର୍ତ୍ତନ ତୁଳନାରେ କ୍ଷମତାରେ ରହିବାକୁ ଗୁରୁତ୍ୱ ପ୍ରଦାନ କରାଯାଉଥିବା ଗଡକରୀ କହିଥିଲେ।
