ଜଳେଶ୍ଵର: ବାଲେଶ୍ବର ଜିଲ୍ଲାର ଜଳେଶ୍ଵର ଥାନା ଅଧୀନସ୍ଥ ମହମ୍ମଦ ନଗର ପାଟଣା ପଞ୍ଚାୟତ କୁବାଡିଆ ଗ୍ରାମରେ ଘଟିଛି ଏକ ଅଭାବନୀୟ ଦୃଶ୍ୟ । ନିଜ ସ୍ତ୍ରୀକୁ ପିଟିପିଟି ମାରିଦେଇଛି ସ୍ଵାମୀ। ଯାହାକୁ ନେଇ ସ୍ଥାନୀୟ ଅଂଚଳରେ ଚର୍ଚ୍ଚାର ବିଷୟ ପାଲଟିଛି ।
କୁବାଡିଆ ଗ୍ରାମର କନ୍ଦା କିସ୍କୁଙ୍କ ସହ ଗାଁର ଅନ୍ୟ ଜଣେ ମହିଳାଙ୍କ ସହ ଅନୈତିକ ସମ୍ପର୍କ ରହିଛି। ଏହି କାରଣରୁ ବିଭିନ୍ନ ସମୟରେ କନ୍ଦା ତାଙ୍କ ପତ୍ନୀ ଦୁର୍ଗୀ(୨୦)ଙ୍କୁ ଶାରୀରିକ ଓ ମାନସିକ ନିର୍ଯାତନା ଦେଉଥିଲେ। ଏପରିକି କିଛି ଦିନ ତଳେ କନ୍ଦା ତାଙ୍କ ପତ୍ନୀଙ୍କୁ ଘରୁ ମାଡ଼ ମାରି ଘଉଡ଼ାଇ ଦେଇଥିଲେ। ସେହିଦିନଠାରୁ ଦୁର୍ଗୀ ତାଙ୍କ ୩ ବର୍ଷର ପୁଅ ଓ ୭ ବର୍ଷର ଝିଅ ସହ ସେହି ଗାଁରେ ତାଙ୍କ ବାପା ଧାନରାୟ କିସ୍କୁଙ୍କ ଘରେ ରହି ଆସୁଥିଲେ। ତେବେ ଦୁର୍ଗୀ ଙ୍କୁ ଜୀବନରୁ ମାରିଦେବେ ବୋଲି କନ୍ଦା ବିଭିନ୍ନ ସମୟରେ ଧମକ ଚମକ ମଧ୍ୟ ଦେଉଥିଲେ।
ଗତକାଲି ସନ୍ଧ୍ୟାରେ ଗାଁ ଏକ ନିଛାଟିଆ ସ୍ଥାନରେ ଦୁର୍ଗି ନିଜ ବାପା ଘରକୁ ଫେରୁଥିବା ବେଳେ ଏହି ସମୟରେ କନ୍ଦା ଅତର୍କିତ ଭାବେ ଆକ୍ରମଣ କରି ନିସ୍ତୁକ ମାଡ଼ ମାରିବା ସହ ହାତ ଗୋଡ଼ ଭାଙ୍ଗି ଦେଇ ପଳାଇଥିଲେ। ବିଳମ୍ବରେ ବାପ ଘର ଲୋକେ ଖବର ପାଇ ଘଟଣାସ୍ଥଳରୁ ଦୁର୍ଗୀଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ଜଳେଶ୍ୱର ଘରକୁ ଆଣିଥିବା ବେଳେ ସେଠାରେ ତାଙ୍କର ମୃତ୍ୟୁ ହୋଇଛି।
ଖବର ପାଇ ଆଜି ସକାଳେ ଜଳେଶ୍ଵର ଆଇଆଇସି ରୋଜାଲିନ ବେହେରା ଧାନରାୟ କିସ୍କୁଙ୍କ ଘର ସହ ଘଟଣାସ୍ଥଳକୁ ଯାଇ ତଦନ୍ତ ଆରମ୍ଭ କରିଛନ୍ତି।
