ଭୁବନେଶ୍ୱର ( ସତ୍ୟପାଠ ବ୍ୟୁରୋ ): କଂଗ୍ରେସ ଅଧ୍ୟକ୍ଷ ପଦ ନିର୍ବାଚନ ପାଇଁ ଆଜି ବିଦ୍ଧିବଦ୍ଧ ବିଜ୍ଞପ୍ତି ପ୍ରକାଶ ପାଇଛି। ଏହି ନିର୍ବାଚନ ପାଇଁ ନାମାଙ୍କନ ପ୍ରକ୍ରିୟା ସେପ୍ଟେମ୍ବର ୨୪ରୁ ଆରମ୍ଭ ହେବାକୁ ଯାଉଛି। ଏହି ସମୟରେ ରାହୁଲ ଗାନ୍ଧୀ ଅଧ୍ୟକ୍ଷ ପଦ ପାଇଁ ଦୌଡ଼ରେ ଥିବା ନେତାମାନଙ୍କୁ ଏକ ପରାମର୍ଶ ଦେଇଛନ୍ତି। ଭାରତ ଯୋଡା ଯାତ୍ରାରେ ଥିବା ରାହୁଲ ଗାନ୍ଧୀ ଗୁରୁବାର କହିଛନ୍ତି ଯେ, କଂଗ୍ରେସର ଅଧ୍ୟକ୍ଷ ପଦ କେବଳ ଏକ ପଦବୀ ନୁହେଁ ବରଂ ଏହା ବିଶ୍ୱାସର ପ୍ରତୀକ। ଏହା ଭାରତର ଭବିଷ୍ୟକୁ ପ୍ରତିନିଧିତ୍ୱ କରେ।
ଗଣମାଧ୍ୟମ ସହ ଆଲୋଚନା ବେଳେ ରାହୁଲ ଗାନ୍ଧୀ କହିଛନ୍ତି ଯେ, ‘ଯେଉଁମାନେ କଂଗ୍ରେସ ଅଧ୍ୟକ୍ଷ ପଦବୀ ପାଇଁ ପ୍ରତିଦ୍ୱନ୍ଦ୍ୱିତା କରୁଛନ୍ତି ସେମାନଙ୍କ ପାଇଁ ମୋର ପରାମର୍ଶ ହେଉଛି ଆପଣ ଯେଉଁ ପଦବୀ ପାଇବାକୁ ଯାଉଛନ୍ତି ତାହା ଐତିହାସିକ ଏବଂ ଏହା ଭାରତର ବିଚାରକୁ ପ୍ରତିନିଧିତ୍ୱ କରେ। କଂଗ୍ରେସ ଅଧ୍ୟକ୍ଷ ପଦବୀ ଏକ ଆଦର୍ଶଗତ ପଦବୀ। କଂଗ୍ରେସ ଅଧ୍ୟକ୍ଷ ଏକ ଧାରଣା, ଏକ ବିଶ୍ୱାସ ପ୍ରଣାଳୀ ଏବଂ ଭାରତର ଦୃଷ୍ଟିକୋଣକୁ ପ୍ରତିନିଧିତ୍ୱ କରନ୍ତି।’
ଏହି ସମୟରେ ରାହୁଲ ଗାନ୍ଧୀ ମୋଦୀ ସରକାରଙ୍କୁ ମଧ୍ୟ ଟାର୍ଗେଟ କରିଥିଲେ। ସେ କହିଛନ୍ତି ଯେ, ଆମେ ଏକ ଏଭଳି ମେସିନ୍ ସହିତ ଲଢ଼ୁଛୁ, ଯାହା ଦେଶର ଅନୁଷ୍ଠାନଗୁଡ଼ିକୁ କବଜା କରି ନେଇଛି। ସେମାନଙ୍କ ପାଖରେ ବହୁତ ଟଙ୍କା ଅଛି। ତେଣୁ ସେମାନେ ଏସବୁ କିଣି ପାରିବେ। ଲୋକଙ୍କ ଉପରେ ଚାପ ପକାଇ ସେମାନଙ୍କୁ ଧମକ ଦେଇପାରିବେ। ଗୋଆ ହେଉଛି ଏହାର ଉଦାହରଣ ବୋଲି ସେ କହିଛନ୍ତି।
ସୂଚନାଯୋଗ୍ୟ ଯେ, କଂଗ୍ରେସ ଅଧ୍ୟକ୍ଷ ପଦ ନିର୍ବାଚନ ପାଇଁ ଆଜି ବିଜ୍ଞପ୍ତି ଜାରି ହୋଇଛି। କାର୍ଯ୍ୟସୂଚୀ ଅନୁଯାୟୀ, ଯେକୌଣସି ନେତା ନିର୍ବାଚନରେ ପ୍ରତିଦ୍ୱନ୍ଦ୍ୱିତା ପାଇଁ ସେପ୍ଟେମ୍ବର ୨୪ରୁ ୩୦ପର୍ଯ୍ୟନ୍ତ ନାମାଙ୍କନପତ୍ର ଦାଖଲ କରିପାରିବେ। ନାମାଙ୍କନ ପ୍ରତ୍ୟାହାରର ଶେଷ ତାରିଖ ଅକ୍ଟୋବର ୮ ରହିଛି।
