(ସତ୍ୟପାଠ ବ୍ୟୁରୋ) ଭୁବନେଶ୍ବର : ବନ୍ୟା ପ୍ରଭାବିତ ଅସହାୟ ଲୋକଙ୍କ ଆକ୍ରୋଶର ଶିକାର ହେଲେ କେନ୍ଦ୍ର କୃଷି ମନ୍ତ୍ରୀ ନରେନ୍ଦ୍ର ସିଂ ତୋମର। ଲାଗିଲା ମୁର୍ଦ୍ଦାବାଦ୍ ନାରା ମନ୍ତ୍ରୀଙ୍କ ଉପରକୁ କାଦୁଅ ଫିଙ୍ଗିଲେ ବନ୍ୟା ପୀଡିତ। କେନ୍ଦ୍ର କୃଷି ମନ୍ତ୍ରୀ ନରେନ୍ଦ୍ର ସିଂ ତୋମାର ମଧ୍ୟପ୍ରଦେଶର ଶୋପୁରରେ ବନ୍ୟା ପ୍ରଭାବିତ ଅଞ୍ଚଳ ପରିଦର୍ଶନରେ ଯାଇଥିଲେ। ଏହି ସମୟରେ ପ୍ରଭାବିତ ଲୋକଙ୍କ କ୍ରୋଧର ଶିକାର ହେଲେ ମନ୍ତ୍ରୀ। କ୍ରୋଧିତ ଅଞ୍ଚଳବାସୀ ମନ୍ତ୍ରୀଙ୍କ କାର ଉପରେ କାଦୁଅ ମଧ୍ୟ ଫିଙ୍ଗିଥିଲେ। ପରେ ବନ୍ୟା ପୀଡ଼ିତାମାନେ ମନ୍ତ୍ରୀଙ୍କ କାର ସମ୍ମୁଖରେ ଶୋଇ ପଡିଥିଲେ ଏବଂ ତାଙ୍କ ବିରୋଧରେ ମୁର୍ଦାବାଦର ସ୍ଲୋଗାନ ମଧ୍ୟ ଦେଇଥିଲେ। ମଧ୍ୟପ୍ରଦେଶ ସରକାରଙ୍କ ସୂଚନା ମୁତାବକ , ଏହି ସପ୍ତାହ ଆରମ୍ଭରେ ପ୍ରବଳ ବର୍ଷା ପରେ ରାଜ୍ୟର ଉତ୍ତର ଭାଗରେ ବନ୍ୟା ଯୋଗୁଁ ୧୨୫୦ ଗାଁ ପ୍ରଭାବିତ ହୋଇଛି। ବର୍ଷା ଯୋଗୁଁ ମୃତ୍ୟୁ ସଂଖ୍ୟା ଏବେ ୨୪ କୁ ବୃଦ୍ଧି ପାଇଛି ବୋଲି ଅଧିକାରୀମାନେ ଶନିବାର ସୂଚନା ଦେଇଛନ୍ତି। ରାଜ୍ୟର ଗ୍ୱାଲିଅର୍, ଶିବପୁରୀ, ଡାଟିଆ, ଅଶୋକ ନାଗର, ଗୁନା, ଭଣ୍ଡ ଏବଂ ମୋରେନା ଜିଲ୍ଲାରେ ପ୍ରବଳ ବର୍ଷା ହୋଇଛି।
ମଧ୍ୟପ୍ରଦେଶ କଂଗ୍ରେସ ସଭାପତି କମଲ ନାଥ ଶନିବାର କହିଛନ୍ତି ଯେ ବନ୍ୟା ଯୋଗୁଁ ରାଜ୍ୟର ଗ୍ୱାଲିଅର ଏବଂ ଚମ୍ବଲରେ ବହୁ କ୍ଷୟକ୍ଷତି ହୋଇଛି। ଶୋପୁରରେ ବନ୍ୟା ପ୍ରଭାବିତ ଅଞ୍ଚଳରେ ଏରିଆଲ ସର୍ଭେ କରିବା ପରେ ସେ ବନ୍ୟା ପ୍ରଭାବିତ କିଛି ଜିଲ୍ଲା ପରିଦର୍ଶନ କରିଥିଲେ। ବନ୍ୟା କ୍ଷତିଗ୍ରସ୍ତ ଅଞ୍ଚଳ ପରିଦର୍ଶନ ପରେ କମଲ ନାଥ ଗଣମାଧ୍ୟମକୁ କହିଛନ୍ତି, “ମୁଁ ମୋ ଜୀବନରେ ଏପରି ବିପଦ କେବେ ଦେଖି ନାହିଁ। ୮୦ ପ୍ରତିଶତ ଲୋକ ଛାତ ଉପରେ ଥିବା ବେଳେ ବନ୍ୟା ଯୋଗୁଁ ଜମି ଓ ଫସଲର ବ୍ୟାପକ କ୍ଷୟକ୍ଷତି ହୋଇଛି।
ପୂର୍ବତନ ମୁଖ୍ୟମନ୍ତ୍ରୀ କହିଛନ୍ତି ଯେ ଶିବରାଜ ସିଂ ସରକାର ଅନେକ ଘୋଷଣା କରିଛନ୍ତି କିନ୍ତୁ ଏହା ରାଜନୀତି କରିବାର ସମୟ ନୁହେଁ। ସେ କହିଛନ୍ତି, “ଆମେ ସହାୟତା ଯୋଗାଉଛୁ ଏବଂ କଂଗ୍ରେସ ଆଗକୁ ମଧ୍ୟ ସାହାଯ୍ୟ ଜାରି ରଖିବ।”
ସେ ପ୍ରଶ୍ନ କରିଛନ୍ତି ଯେ, ” କ୍ଷତିପୂରଣ ଦେବାକୁ ଆପଣ (ସରକାର) କ୍ଷୟକ୍ଷତିର ଆକଳନ କରିବାକୁ ଯାଉଛନ୍ତି କି ? ଆପଣ କେତେ ସାହାଯ୍ୟ ଦେଉଛନ୍ତି ? ବର୍ଷା ଯୋଗୁଁ କ୍ଷତିଗ୍ରସ୍ତ ହୋଇଥିବା ସେତୁଗୁଡ଼ିକ କେବେ ମରାମତି ହେବ ଏବଂ ବନ୍ୟା ଯୋଗୁଁ ବାସହୀନ ହୋଇପଡିଥିବା ଲୋକମାନେ କେବେ ଘର ପାଇବେ।
ଏହାପୂର୍ବରୁ ମୁଖ୍ୟମନ୍ତ୍ରୀ ଶିବରାଜ ସିଂ ଚୌହାନ କହିଛନ୍ତି ଯେ ରାଜ୍ୟର ବନ୍ୟା ପ୍ରଭାବିତ ଅଞ୍ଚଳରୁ ୮୮୩୨ ଜଣଙ୍କୁ ଉଦ୍ଧାର କରାଯାଇଥିବାବେଳେ ୨୯୨୮୦ ଜଣଙ୍କୁ ଏହି ଅଞ୍ଚଳରୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇଛି।ସୂଚନାଯୋଗ୍ୟ ଯେ ମଧ୍ୟପ୍ରଦେଶ ସରକାର ଶୁକ୍ରବାର ଦିନ ବନ୍ୟା ପ୍ରଭାବିତ ଲୋକଙ୍କୁ ରିଲିଫ ଯୋଗାଇବା ଏବଂ ପରିବାର ପ୍ରତି ୫୦ କିଲୋଗ୍ରାମ ଅତିରିକ୍ତ ଖାଦ୍ୟ ଶସ୍ୟ ଯୋଗାଇବା ସହିତ ଛଅ ହଜାର ଟଙ୍କା (ଘର ଭଡା ପାଇଁ) ଦେବାକୁ ଘୋଷଣା କରିଛନ୍ତି।
