(ସତ୍ୟପାଠ ବ୍ୟୁରୋ) ଭୁବନେଶ୍ୱର : ଦେଶରେ କରୋନା ମହାମାରୀର ତୃତୀୟ ଲହର ଆସିବା ନେଇ ବିଶେଷଜ୍ଞ ମାନେ ଚେତାବନୀ ଦେଇଛନ୍ତି। ତେବେ ଏହା ମଧ୍ୟରେ କେନ୍ଦ୍ର ଗୃହ ମନ୍ତ୍ରଣାଳୟ ଦ୍ୱାରା ଗଠିତ ଏକ ବିଶେଷଜ୍ଞ କମିଟି ଚେତାବନୀ ଦେଇଛନ୍ତି ଯେ ଅକ୍ଟୋବର ମାସରେ କୋଭିଡର ତୃତୀୟ ଲହର ପିକ୍ ରେ ପହଞ୍ଚିବ। ଏବଂ ତୃତୀୟ ତରଙ୍ଗ ପିଲାମାନଙ୍କୁ ଅଧିକ ପ୍ରଭାବିତ କରିବାର ଆଶଙ୍କା ଥିବାରୁ ସ୍ବାସ୍ଥ୍ୟସେବାରେ ଉନ୍ନତି ଆଣିବା ପାଇଁ କମିଟି ଦାବି କେନ୍ଦ୍ର ସରକାରଙ୍କୁ କହିଛି। ଅନେକ ବିଶେଷଜ୍ଞ ମାନଙ୍କ ମତ ହେଉଛି ଯେ ଯେ ତୃତୀୟ ତରଙ୍ଗରେ ପିଲାମାନେ ମଧ୍ୟ ବୟସ୍କଙ୍କ ପରି ବିପଦରେ ପଡ଼ିବେ।
ନ୍ୟାସନାଲ ଇନଷ୍ଟିଚ୍ୟୁଟ୍ ଅଫ୍ ଡିଜାଷ୍ଟର ମ୍ୟାନେଜମେଣ୍ଟ (ଏନଆଇଡିଏମ୍) ଅଧୀନରେ ଗଠିତ କମିଟିର ରିପୋର୍ଟରେ କୁହାଯାଇଛି ଯେ ଶିଶୁଙ୍କ ପାଇଁ ଚିକିତ୍ସା ସୁବିଧା, ଡାକ୍ତର, କର୍ମଚାରୀ, ଭେଣ୍ଟିଲେଟର, ଆମ୍ବୁଲାନ୍ସ ଭଳି ଜରୁରୀ ମେଡିକାଲ ଉପକରଣ ଉପଲବ୍ଧ ରଖାଯାଉ। ପୂର୍ବ ପ୍ରସ୍ତୁତି ଏମିତି କରାଯାଉ ଯେପରି ବହୁ ସଂଖ୍ୟକ ଶିଶୁ ସଂକ୍ରମିତ ନହୁଅନ୍ତି ।’ ଟାଇମ୍ସ ଅଫ୍ ଇଣ୍ଡିଆ (TOI) ରିପୋର୍ଟ ଅନୁଯାୟୀ ଏହି ବିଶେଷଜ୍ଞ କମିଟିର ରିପୋର୍ଟ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ (ପିଏମଓ) କୁ ଦିଆଯାଇଛି।
ବିଶେଷଜ୍ଞମାନେ କ’ଣ ପରାମର୍ଶ ଦେଇଛନ୍ତି ?
ପିଲାମାନଙ୍କର ଟୀକାକରଣକୁ ପ୍ରାଥମିକତା ଦେବା ଉପରେ ଗୁରୁତ୍ୱାରୋପ କରାଯାଇଛି। ସେହିପରି ବିଶେଷଜ୍ଞ ମାନେ କହିଛନ୍ତି ଯେ କଠୋର କଟକଣା ସତ୍ତ୍ୱେ ବି ଅକ୍ଟୋବର ଶେଷ ସୁଦ୍ଧା କୋଭିଡର ତୃତୀୟ ତରଙ୍ଗ ପିକ୍ ରେ ପହଞ୍ଚିବା ଆଶଙ୍କା ରହିଛି । ତେବେ ଏହି ଆକଳନ ଅନ୍ୟାନ୍ୟ ଅନୁଷ୍ଠାନର ଆକଳନ ସହିତ ମଧ୍ୟ ମେଳ ଖାଉଛି । ବିଶେଷଜ୍ଞମାନେ ପରାମର୍ଶ ଦେଇଛନ୍ତି ଯେ ‘ଶିଶୁଙ୍କ ପାଇଁ ସୁବିଧା ତୁରନ୍ତ ବୃଦ୍ଧି କରାଯିବା ଉଚିତ, ଘରୋଇ ଚିକିତ୍ସା ମଡେଲ ପ୍ରସ୍ତୁତ କରାଯିବା ଉଚିତ ଏବଂ ପିଲାମାନଙ୍କର ମାନସିକ ସ୍ବାସ୍ଥ୍ୟକୁ ପ୍ରାଧାନ୍ୟ ଦିଆଯିବା ଉଚିତ’। ଏହି ରିପୋର୍ଟରେ ଏପରି କୋଭିଡ ୱାର୍ଡର ଗଠନ ପରାମର୍ଶ ଦିଆଯାଇଛି, ଯେଉଁଥିରେ ପିଲାମାନଙ୍କର ପିତାମାତା ସେମାନଙ୍କ ସୁସ୍ଥ ହେବା ପର୍ଯ୍ୟନ୍ତ ନିରାପଦରେ ରହିପାରିବେ।
ଏହି କମିଟିରେ କିଏ କିଏ ଥିଲେ ?
TOI ରିପୋର୍ଟ ଅନୁଯାୟୀ, ବିଶେଷଜ୍ଞ କମିଟିରେ CSIR-IGIB ର ନିର୍ଦ୍ଦେଶକ ଅନୁରାଗ ଅଗ୍ରୱାଲ, ଏଆଇଏମଏସର ପୂର୍ବତନ ନିର୍ଦ୍ଦେଶକ ନବୀନ ଠାକୁର, ଭାରତୀୟ ଶିଶୁ ଚିକିତ୍ସା ସଂଘର ସଭାପତି ନବୀନ ଠାକୁର, ସିଏମସି ଭେଲୋରର ପ୍ରଫେସର ଗଗନଦୀପ କାଙ୍ଗ ଏବଂ ରାଜ୍ୟ ମନିଟରିଂର ଅଧ୍ୟକ୍ଷ ଏ.କେ ପାଣ୍ଡେ ଅଛନ୍ତି। ବିଶେଷଜ୍ଞମାନେ କହିଛନ୍ତି ଯେ ଯଦି ଆମେ R- ଭାଲ୍ଯୁ ବୃଦ୍ଧି ପାଏ , ତେବେ ତୃତୀୟ ତରଙ୍ଗ ଆସିବାକୁ ପ୍ରସ୍ତୁତି ଜୋରଦାର କରିବା ଉଚିତ। ଜୁଲାଇର ଶେଷ ସପ୍ତାହରେ, ଏହି ମୂଲ୍ୟ 0.9 ରୁ 1 କୁ ବୃଦ୍ଧି ପାଇଥିଲା ।
ନୀତି ଆୟୋଗ ସଦସ୍ୟ ଡକ୍ଟର ଭି.କେ ପଲ କଣ କହିଛନ୍ତି ?
ଅପରପକ୍ଷରେ ନୀତି ଆୟୋଗ ସଦସ୍ୟ (ସ୍ୱାସ୍ଥ୍ୟ)ଡକ୍ଟର ଭି.କେ ପଲ କେନ୍ଦ୍ର ସରକାରଙ୍କୁ କହିଛନ୍ତି ଯେ ତୃତୀୟ ଲହର ସମୟରେ ପ୍ରତି ୧୦୦ ସଂକ୍ରମିତଙ୍କ ମଧ୍ୟରେ ୨୩ ଜଣଙ୍କୁ ହସ୍ପିଟାଲରେ ଭର୍ତ୍ତି ହେବାକୁ ପଡିପାରେ । ଦ୍ୱିତୀୟ ଲହର ବେଳେ ଜୁନ ୧ ତାରିଖ ବେଳକୁ ସକ୍ରିୟ ମାମଲା ଶୀର୍ଷରେ ପହଞ୍ଚିଥିଲା । ସେତେବେଳେ ମୋଟ ସକ୍ରିୟ ରୋଗୀଙ୍କ ସଂଖ୍ୟା ଥିଲା ୧୮ ଲକ୍ଷରୁ ଅଧିକ । ସେମାନଙ୍କ ମଧ୍ୟରୁ ୨୧.୭୪ ପ୍ରତିଶତ ଆକ୍ରାନ୍ତଙ୍କୁ ହସ୍ପିଟାଲରେ ଭର୍ତ୍ତି ହେବାକୁ ପଡିଥିଲା । ୨.୨ ପ୍ରତିଶତ ରୋଗୀ ଆଇସିୟୁରେ ଥିଲେ । ଦୈନିକ ୫ ଲକ୍ଷ ସଂକ୍ରମିତ ହେଲେ ତାର କିଭଳି ମୁକାବିଲା କରାଯାଇପାରିବ ସେଥିପାଇଁ ଆବଶ୍ୟକ ସ୍ୱାସ୍ଥ୍ୟ ଭିତ୍ତିଭୂମି ପ୍ରସ୍ତୁତ କରିବାକୁ ପଡିବ । ତେଣୁ ସେପ୍ଟେମ୍ବର ମାସ ସୁଦ୍ଧା ୨ ଲକ୍ଷ ଆଇସିୟୁ ବେଡ୍ (୧.୨ ଲକ୍ଷ ଭେଣ୍ଟିଲେଟର ସହିତ), ୭ ଲକ୍ଷ ସାଧାରଣ ବେଡ୍ (୫ ଲକ୍ଷ ଅକ୍ସିଜେନ ସହିତ), ଏବଂ ୧୦ ଲକ୍ଷ ଆଇସୋଲେସନ ବେଡ୍ ପ୍ରସ୍ତୁତ କରିବାକୁ ସେ ପ୍ରସ୍ତାବ ଦେଇଛନ୍ତି ।
