(ସତ୍ଯପାଠ ବ୍ୟୁରୋ) ଭୁବନେଶ୍ୱର : ଗତ କିଛି ଦିନ ହେବ ଜାତୀୟ ରାଜନୀତିରେ ବିରୋଧୀ ଏକଜୁଟତାକୁ ନେଇ ଚର୍ଚ୍ଚା ଜୋର ଧରିଛି। ୨୦୨୪ ରେ ଭାରତୀୟ ଜନତା ପାର୍ଟି ବିରୋଧରେ ବିରୋଧୀ ଦଳ ଏବେ ଏକାଠୀ ହେଉଥିବା ନେଇ ବିରୋଧୀ ଦଳ ଗୁଡ଼ିକ ପକ୍ଷରୁ ପ୍ରୟାସ କରାଯାଉଛି। ଏପଟେ ତୃଣମୂଳ କଂଗ୍ରେସ ନେତା କହିଛନ୍ତି ଯେ, ରାହୁଲ ଗାନ୍ଧୀ ବିରୋଧୀ ଚେହେରା ନୁହେଁ । ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ବିରୋଧରେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ ବିରୋଧୀ ଚେହେରା ବୋଲି କହିଥିଲେ। ଏହାକୁ ନେଇ ଏବେ ରାଜନୀତି ସରଗରମ ହୋଇଛି।
ଟିଏମସି ନେତାଙ୍କ ଏଭଳି ବୟାନକୁ ନେଇ କଂଗ୍ରେସ ନେତା ଅଧୀର ରଂଜନ ଚୌଧୁରୀ ମମତା ବାନାର୍ଜୀଙ୍କ ଉପରେ ଅସନ୍ତୋଷ ବ୍ୟକ୍ତ କରିଛନ୍ତି। ଶୁକ୍ରବାର ଦିନ ଆଧୀର ରଂଜନ କହିଛନ୍ତି ଯେ ସେ ଟିଏମସି ନେତାଙ୍କ ବୟାନରେ ସହମତ ନୁହଁନ୍ତି। ସେ କହିଛନ୍ତି ଯେ ଟିଏମସି ମୁଖପାତ୍ର ମମତାଙ୍କୁ ବିରୋଧୀ ଦଳର ପ୍ରଧାନମନ୍ତ୍ରୀ ବୋଲି ବର୍ଣ୍ଣନା କରିଛନ୍ତି। ଏପରି ବିବୃତ୍ତି ବିରୋଧୀଙ୍କ ଏକଜୁଟତା ଅଭିଯାନକୁ ଦୁର୍ବଳ କରିବ ବୋଲି ଅଧୀର ରଂଜନ ଚୌଧୁରୀ କହିଛନ୍ତି।
ସୂଚନାଯୋଗ୍ୟ ଯେ ଏହା ପୂର୍ବରୁ ଟିଏମସି କହିଥିଲା ଯେ ରାହୁଲ ଗାନ୍ଧୀ ପ୍ରଧାନମନ୍ତ୍ରୀ ମୋଦୀଙ୍କ ବିକଳ୍ପ ଚେହେରା ହେବାରେ ବିଫଳ ହୋଇଛନ୍ତି। ସେଥିପାଇଁ ଦଳ ମମତାଙ୍କୁ ବିରୋଧୀ ଦଳର ନେତୃତ୍ୱ ନେବାକୁ ଦାବି କରିଥିଲା। ଟିଏମସିର ଏଭଳି ଦାବିକୁ ନେଇ ଅଧୀର ରଂଜନ ଚୌଧୁରୀ ଉତ୍ତର ରଖିଛନ୍ତି। ଏହାପୂର୍ବରୁ ଟିଏମସିର ଏଭଳି ଦାବିକୁ ନେଇ କଂଗ୍ରେସ ଗୁରୁତ୍ୱ ଦେବାକୁ ମନା କରିଦେଇଥିଲା। ଏହା ପରେ କୁହାଯାଇଥିଲା ଯେ ମୋଦୀଙ୍କ ବିକଳ୍ପ ଚେହେରା କିଏ ହେବ ତାହା ଏତେ ଶୀଘ୍ର ପୂର୍ବାନୁମାନ କରିବା ଠିକ୍ ହେବ ନାହିଁ।
ତେବେ ଏଠାରେ ଉଲ୍ଲେଖଯୋଗ୍ୟ ଯେ , ଟିଏମସର ବଙ୍ଗାଳୀ ମୁଖପାତ୍ର ‘ଜାଗୋ ବଙ୍ଗଳା’ର କଭର୍ ଷ୍ଟୋରୀ ପ୍ରକାଶ ପାଇଥିଲା। ଏଥିରେ ଲୋକସଭାରେ ଟିଏମସି ଦଳର ନେତା ସୁଦୀପ ବାନ୍ଦୋପାଧ୍ୟାୟ କହିଛନ୍ତି ଯେ ପ୍ରଧାନମନ୍ତ୍ରୀ ପଦ ପାଇଁ ରାହୁଲ ଗାନ୍ଧୀ ବିଫଳ ହୋଇଛନ୍ତି, ମମତା ବାନାର୍ଜୀ ହେଉଛନ୍ତି ଏହାର ବିକଳ୍ପ ଚେହେରା। ସେ କହିଛନ୍ତି ଦେଶ ଏକ ବିକଳ୍ପ ଚେହେରା ଖୋଜୁଛି। ମୁଁ ରାହୁଲ ଗାନ୍ଧୀଙ୍କୁ ଦୀର୍ଘ ଦିନରୁ ଜାଣିଛି, କିନ୍ତୁ ମୁଁ ନିଶ୍ଚୟ କହିବି ଯେ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ବିକଳ୍ପ ଚେହେରା ଭାବରେ ଉଭା ହେବାରେ ସେ ବିଫଳ ହୋଇଛନ୍ତି। କିନ୍ତୁ, ମମତା ବାନାର୍ଜୀ ଏକ ବିକଳ୍ପ ଚେହେରା ଭାବରେ ଉଭା ହେବାକୁ ସକ୍ଷମ ହୋଇଛନ୍ତି ।
